Shillong: Ki paidbah ka Laitkor Pyllun da dap ki dei sñiawkmen hadien wa u Samlin Malngiang, uwa man u montri ka chnat PHE da booh mooyurim u ya ka Greater Laitkor Water Supply Scheme hei emlang u Lambor Malngiang, u MLA ka thaaiñ, u MDC ka Nongkrem Constituency wa u Chairman ka State Planning Board chirup wa ki heh ka chnat PHE ki Rangbah Shnong wa ki Village Water And Sanitation Committee.
Ya ini i wai mooyurim da pynman ha Laitkor Pyllun Community Hall ya kawa da pynlai da ka Laitkor Dorbar Pyllun wa ki Village Water and Sanitation Committee, Laitkor Pyllun.
Ya kani ka kreh da pynlait ha u Naiynñiaw uni u snem hei lut iwa T. 28.99 klur, wei ka Greater Laitkor Water Supply Scheme daw man ko neibynta ka Laitkor Lumheh, Laitkor Rngi, Laitkor Nongdaneng wa Laitkor Mawri.
Na kani ka Scheme daw yoh myntoi hadooh 2500 tylli ki manyung heiwa daw em 15,000 ngut kiwa chong chnong kiwa daw yoh umdih da kawa hoi u dih wei da booh thong wow pyndep i kreh hapoh ar snem.
U Samlin hawa e i klam da yaroh u ya u MLA wa MDC ka thaaiñ uwa da chimkhia bha wow booddien ya kani ka Scheme deiwa pyntip leh wa nadooh u 2017, T. 453 klur da pynlait da ka sorkar pyrdi wa ka jylla wow pynkreh da ka chnat PHE.
Heiyatoh wa ka Jal Jeevan Mission, kawa man ka Scheme ka sorkar pyrdi wow pynpoi umkor cha waroh ki manyung ka ri chwa u 2024, heiwa u Samlin da ong u wa da booh thong wow pyndep chiteiñ namo 2,04,000 tylli ki manyung chwa u 2020.
Da pyntip u leh wa i kreh wow chna pynmiat ya ka Mawkma-Laitryngew Water Supply Scheme wa Mawphlang-Mawngap-Marbisu Water Supply Scheme da pynlait hadooh T. 10 klur wa T. 30 klur wei da yooluti wow pyndep smat noh ya ki.
U Lambor Malngiang hawa e i klam da pynsñiaw u yei mynsien wa kmen wei sñiawngooh ya ki tre thaw kiwa da e yei thaw yong ki mynkna wow pynkreh ya kani ka Scheme deiwa pynrap wa hajrong i chitom poisa da kmen u wa ka sorkar da ye ko wow pynlait ya kani ka poisa wow pyndap yei duna um ha ki chnong wa em ha ka thaaiñ Laitkor.
Ha kani ka sngi da chim leh ya ka rai da ka Executive Committee ka Laitkor Dorbar Pyllun wa ka Village Water and Sanitation Committee heiyatoh wa i pynlai bait ya i kreh ya ka Scheme, wei ya kani ka bui da ekti ha u MLA wa MDC kamjooh leh ha u Additional Chief Engineer ka chnat PHE.