Haka kyrwoh wa phah da ki soo tylli ki seiñbhalang kitæ ka KSU, FKJGP, HNYF waka RBYF heiyatoh waka dorkhat wa e da ki le ngut kitæ u Prantush Sarkar, u Mridul Das wa u Vinayak Roy kiwa da pynyoo yaka jylla kawa em i leh chilliang deiwa kheiñ yaka jaitbru waka niam.
Kini ki soo seiñ da ong ki wa i kam kini ki 3 ngut wa ki Hindu hapoh Meghalaya da pyndooh ki yei hok yong ki wow yoh EPIC, PAN Card, Birth Certificate ka kiwi ki kot ki sla wa toh u yoh ki tre ri, da pynsih ko yei dur ka sorkar Meghalaya kam kawa lehbeiñ hei pyrtuid ka niam katwa iwa man sakhiat toh wa waroh ki baar jylla toh kiwa yoh EPIC, Birth Certificate, Ration Card khlem da pait chilliang namo leh chilliang da ka sorkar wei ym jooh em pynwit ki seiñbhalang ya kitu kiwa ye u pynsakhiat wa ki toh ki tre ri.
Ki soo seiñ da kam ki leh wa ki 3 ngut kiwa lai e dorkhat toh kiwa embynta haka khih khayi moochuni ha Ichamati wei kiwa myllien bha u leh Benami iwa da pyndooh nong yaka jylla, kamtæ kini ki bru da sñiawthooh chwa toh kiwa ym kwah wow em ka Trading License kamjooh u em ki District Council kiwa e ya kini ki License kamtæ da pynbaad ki wa ki seiñbhalang toh kiwa em yei mynisen pynyaphær jaitbru du neidaw wa pyrchang ki wow pynkrehkaam yaka aiñ heiyatoh wa i khayi da ki baar jylla.
Da kam leh wa kini ki 3 ngut toh kiwa chongchit niam Hindu kiwa da pynsih dur leh ya ki Christan wa em hapoh ka jylla deiwa ong wa waroh ki kor krehkaam ka sorkar toh kiwa da krehkaam ha ka yurim ka niam Christan wei da leh ha itæ i rukom wow leh chilliang pyrchah ya ki Hindu wa em hapoh ka jylla.
Da pynbaad leh ya ki pulit wa da ya krehlang ki yow lehbeiñ leh chilliang hei pyrtuid ka niam, kamtæ da kyntu ki soo seiñ wa ki pulit toh u leh ki yei kaam wa emkaam pyrchah ya kini ki bru.
Chooh chooh da ong wa haka dorkhat da pynbaad hadooh yaki yung kachari ka Meghalaya wa emkti ha ini i leh chilliang hei pyrtuid ka niam deilang wa ka District Council waki pulit iwa ki yung kachari leh toh u leh ki yeiwa emkaam yeini i pynbood naam ya ki yung bichaar.
Ki soo seiñ da pynkut ki deiwa ong wa kam ki seiñbhalang ym em jooh pyrkhat ki hawa leh yaki kaam deiwa booh hei pyrtuid ka niam, wei kam ki khian paaid hapoh ka ri da leh ya waroh yow yada, yow pynneh pynsah yei hok wei wow pynku ya ki paaid ri-loom khlem da jied chilliang yaka niam ha waroh ki kaam nadooh ka imlang sahlang, ka synchaar khadar, ka khayi pateiñ ki tre chnong ka jylla.
Kamtæ da dawa naka sorkar, ki pulit, ki District Council wow pynchitom ya kini kiwa chongchit niam Hindu chwa wow poi kani ka kaam cha palat pood.
