Shillong: Hadien wa lait tooh ki Question Paper yong ka Meghalaya Teachers Eligibility Test (MTET) neiliang kiwa yakhun ya kani ka kiwa yooluti wow chah jied kam kiwa sikai LP wa UP School, ynne ka sngi da dawa ki na ka sorkar jylla wow pynman biang da kawi ka Exam.
Hajrong ka ujor ka Sofi Kamrul Hassan, kawa man kam ka muktiar ka Meghalaya High Court da ujor ko hadien wa ki dur yong kini ki thup kylli kiwa da man neibynta kani ka Exam ha ka 31 Duyatra da poor ki lyngba ki Social Media kam ka WhatsApp.
Hawa yaklam wa kiwa pathai khubor, uwi na kiwa yaleh ya kani ka exam, u Jylliew Jingpyrkhat Lyngkhoi da ong u wa hanlada kini ki kot da lait ki ha kawi ka thaw thoh exam ha Tura Government College tangwa kini ki jooh ki ki kot ye ki wow lait cha kiwi tawon ki thaw katwa kamtæ da toh wow pynman biang ya kani ka Exam ha waroh kawi ka jylla.
Da pynrap u leh deiwa ong wa kiwa yakhun ya kani ka Exam ym pdiang ki lada ka sorkar jylla thmu ko wow pynman ya kani ka Exam du ha ka Centre kawa da lait kini ki Question Paper kawa em ha Tura.
Chooh chooh da ong u wa lada ka sorkar ym ap ko yeini i dawa, ym yohsa de ki wow chim da kawi ka laad wow pynbor biang ya ka sorkar wow pynman da kawi ka exam ha waroh kawi ka jylla.
Heijooh i por da ong u wa katkam ka yutip wa yoh ki, ya kini ki kot kylli yutip da lait tooh ki hei step ka 31 Duyatra heipor 1:30 waje i step synyaw chwa wow thoh ya ka exam MTET.
Discussion about this post