Dawa kyrriah ka MPUF ya ki BSF wa booh thaw sah hajan yingkieñ Sonapur

Jowai: Ka Meghalaya People’s United Front (MPUF) East Jaiñtia Hills District, kam wow kyrchaan yei dawa ka chnong Sonapur ryngkat ka KSU Sonapur-Unit, da pynsñiaw ko yei pyrchah joor wei kamjooh wow dawa kyrriah ya kitai ki chipai Border Security Force (BSF), kiwa chong hajan ka yingkieñ Sonapur.

Ka seiñ da ong ko wa katkam ka yutip wa ki BSF da chong yabor ki ha kani ka thaw khlem tip ka Dorbar Chnong Sonapur wei khlem tip ki tre thaw kamjooh kammon ka BSF ye ko wow chna thaw sah ha u sarokbah wei ha khap ki chnong bru heiwa ki BSF toh u em ki ha khappood wa ka ri Bangladesh.

I em ki BSF ha ka chnong Sonapur ym pynmyntoi ko iyi iyi leh ya kiwa chong chnong tangwa wanrah ki yei maa wa i syir mynsien ya ki kynthai khynnah hawa lai luti lyngba u sarok neibhah ha ki por nachwa da dep jia wa ki BSF pyndik ki ya ki paidbah.

Kani toh katkam ka wyrta wa phah da u H. Bhoi Publicity Secretary MPUF-CB.