Jowai: Ka Khasi Students’ Union (KSU) haka 12 wa 13 tarik uni u bnai da lai hiar ko cha ka nongbah Aizawl yong ka jylla Mizoram wow yachem wa kiwa yahkhmat ka Mizo Zirlai Pawl (MZP) khnang wow yoh u pynbait ya i eh i khoo ki paaid Khasi wa chong chnong ha Khasi Veng, Vairangte, Kolasib District, da chem ki.
Kam wow pynkynmoo ka seiñ ha u snem 2008 ka da pynbait ko wow poi cha i sñiawthooh wa ka MZP Central Body deilang waka Young Mizo Association (YMA) Shillong hajrong i chah thombor ki paaid Khasi ha Vairangte heiwa da chah tympra ki bri pathi ha kawi ka jaitbru. Ha uni u snem da dawa leh wow e ya ki kot thaw Land Holding Certificates (LHC) ya waroh ki manyung Khasi kiwa sah ha Mizoram.
Hadien 11 snem yong ini i ya pynbait da chem wa neiliang ka sorkar Mizoram wa ym e ko ya ki LHC cha ki paaid Khasi wei ini da pynman ko ya ka KSU wow hiar ko cha Mizoram wow pynbait ya ini i eh wa ki paaid Khasi kiwa man kam kiwa chong kiwa em ka thaw ka bhaw tangwa ka sorkar Mizoram ym bien ko u pdiang ya ki.
Ha ka yalang wa pynman ha ka MZP General Headquarters Office da wanrah ya kani ka phang heiwa da wanrah ya kiwa boon ki daw wa ki Khasi ha Vairangte em ki i hok wow yoh ya ki LHC. Neiliang u Donald V Thabah da batai u wa ki Khasi ki da chong chnong ki ha Vairangte nadooh u 1936 ha chwa wow pynkha ya ka jylla Mizoram wei chwa wow yoh laitlooid ka ri India, kamtæ ki em ki ka hok wow man kam kiwa chong chnong wa pura yong ka Mizoram wei ya ini ye wow pynman sakhiat lada ka sorkar Mizoram ka e ko ya ki LHC yow man ki kam ki tre thaw tre khyndaw.
Chooh u Donald da ong u wa ki paaid Khasi ha Vairangte ki em ki du 70 tylli ki manyung wei ym toh i wan sah buhai chnong na ki paaid Khasi kiwa sah ha Barak Valley, Assam wa na Meghalaya cha ka jylla Mizoram kawa ye u ktah ya ki paaid ki jaitbru Mizo. Kamtæ da kyntu u ya ka MZP wow elaad wow yarap ya kini ki paaid Khasi wa ki u yoh noh ki ya ka hok kawa ki da angnood da ki phaw phaw snem.
Neiliang ka MZP leh kam chibynta wow pynneh wow pynskem chooh chooh ya i yatohlok wa ka KSU, da rai ki wa ym pyrchah ki da kammon kammon leh lada ki Khasi na Vairangte ki lai ki wow paan ya ki kot ki sla thaw.
Chuh chooh ka MZP ka da kular ko leh wa ha kini ki sngi daw lai yachem kyrpang ki ya u Land Revenue Minister yong ka jylla Mizoram wow kyntu ya oo wow e noh ya ki LHC cha waroh 70 tylli ki manyung Khasi ha Khasi Veng, Vairangte. Ka KSU hajrong ini i kular ka MZP da e khublei kyrpang ko ya kiwa yahkhmat ka MZP kiwa smat wow yarap ya ki paaid Khasi wa chemchitom ha Vairangte khamtam ya u Ricky Colney Lalbiakmawia uwa man leh uwa e buit ka MZP wei ha i jooh i por uwa ksoh kam u Finance Secretary ka NESO.
Hadien wa wai kani ka yalang, ka KSU da hiar noh ko cha Khasi Veng, Vairengte kawa em ha khappood Assam wa Mizoram heiwa da yoh wow pynthymme ya kiwa kitkaam ka KSU Vairangte Circle.
Kiwa kitkaam ka KSU Vairangte 
Ki khynroo khyllood ha chnong Khasi Veng
Discussion about this post