Shillong: Kiwa kreh mylla ha yung bru ha ka jylla da dawa pynku bai nongsngi ki na u montri rangbah ka jylla u Conrad K Sangma neibhah wa i dor wa yoh ki katni nab i iwa khian chawa palat.
Hawa yaklam wa kiwa pathai khubor ynne ka sngi, ka Elbina Nongkhlaw ka President ka All Meghalaya Domestic Workers’ Union (AMDWU) da ong ko wa ha i yachem wa u Conrad, ka seiñ da dawa ko wow booh salonsar ya ka dor næ ka nongsngi yong kiwa kreh ha yung bru, kawa yahaap kyrdan khnang wow ye ki u pyndap yeiwa emkaam ha yung ha sem.
Ka Elbina da kyrmen ko wa ka sorkar daw chah chkoor ko yeini i dawa katkam ki kaam wa kreh neipor cheipor, da ong ko leh wa em kiwa kreh kynta katwa em won kiwa kreh waroh chi sngi.
Da dawa ki na ka sorkar wa ka sorkar toh u booh dor ko ya kiwa kreh mylla wei wow booh leh ya ka Workers Welfare Board ha ka jylla.
Neiliang u Conrad da kular u wa ka sorkar daw chong pyrkhat wei daw puræ bniah ko ya ini i dawa yong ki.
Katkam wa ong ka Elbina, emkaam wa ka sorkar u booh ko ya ka Domestic Workers Board kamwa da leh ha kiwi ki jylla khnang wa kiwa kreh mylla ha yung bru u ye ki u yoh yarap na ka sorkar.
Ha ka dorkat wa da ekti ha u Conrad, ka AMDWU da e yumut ko wa ka sorkar toh u booh dor ko T.1,800 chi bnai neibynta kiwa kreh mylla chi kynta chi bnai wow sait that, kiwa sait tiar, sait yung, e um syntu, T.2000 chi bnai ya kiwa chet wa tu chi kynta chi sngi, wa lai booh skur, T.8000 chi bnai ya kiwa pait khonboo, pait ya kiwa tymmen, kreh yung bru chi sngi hapoh 8 kynta chi sngi, wei T.5000 chi bnai kiwa kreh wa kiwa chong yung bru.
Discussion about this post