Ka seiñ Jaiñtia Students’ Union, Central Body hapoh i yahkhmat u President, u Jersom Shylla, u General Secretary, u Neilkee Mukhim deilang kiwi ki dkhot, ynne ka sngi da lai yachem ki wa u DC ka West Jaiñtia Hills District, u Abhinav Kumar Singh, uwa man leh u Chairman ka DSC wow dawa pynsangeh chwa chipor ya ka Exam ka DSC Grade IV Written Exam ka wow man ha ka 29 tarik uni u bnai.
U Jersom Shylla da ong u wa i daw wa dawa pynsangeh chwa toh wa wot ya ka Result Grade IV wa da khut Advertisement nadooh u snem 2021 heiwa ya ka Interview leh da pyndep ha u bnai June 2026, ym pu em pynmih Result hadooh katni.
Sa iwi i daw ong u toh wa da yoo wa ya ka Post LDA dang em ko katni hapoh ka Case ha Meghalaya High Court neidaw wa em i suba leh tooh hapoh kani ka DSC, na itæ i daw ka seiñ dawa ko wa kat wym pu ye u pynbait yei rukom thung kreh hapoh West Jaiñtia Hills toh u pynsangeh chwa ya kani ka Exam.
Wei i lai dawa pynsangeh chwa ki na u DC ka West Jaiñtia Hills ynne toh hadien wa boon kiwa yaleh kreh kamjooh ki paidbah ka Ri-loom Jaiñtia da pynsñiaw ki ya kani ka mat cha ka seiñ, wei khnang yow yoh i chaniah na ki paidbah ong u emkaam u pynsangeh chwa ya kani ka Exam wa daw man.
Heijooh i por ong u ka seiñ ym em pyrchah ko yei thungkreh thungkhih tangwa pyrchah ko ya ka rukom leh heiyatoh wa i pynyaleh kreh.
Hawa pynsñiaw i wyrai ya kitu ki khynroo khyllood wa da kreh chitom neibynta u yakhun ya ki Exam yoh kreh yoh khih waphær waphær da pynkynmoo haroh u wa em kawi ka Case hapoh High Court neidaw wa da mih pyrtuid yaleh Personal Interview da ki wym em thoh næ pyndap iyi iyi leh hapoh ki OMR Sheet.
Wei na kini ki daw da pynman ya ka JSU u artatien ko ya kani ka DSC.
Kamtæ ka seiñ yooluti wei chaniah ko hei bichaar ka High Court wa kiyi kiyi waroh u man kiwa lai bait ryntih neibynta i myntoi kiwa yakhun kreh wa ki paidbah.
Heijooh i por yooluti leh wa ki paidbah u e ki i kyrchaan ya kani ka mat wa ka JSU da mih ko chakhmat u yahluti.
Discussion about this post