January 11, 2022
Ka EJNC-Khliehriat Unit hapoh i yahkhmat yong u President, u Shanborlang Bamon deilang wa u General Secretary, u Diamon Bareh hadien wa ka seiñ da dep lai pait ko ya ki kattu katni ki thaw, da lai yachem wa u In-Charge DC ka East Jaiñtia Hills District, u S.S. Syiemlieh yow yaklam sani hajrong kitu ki thaw wym em Street Light.
U Syiemlieh da pyntip u wa da dep phah yei pyrtuid ki thaw wym em Street Light cha ka Meghalaya Non-Conventional & Rural Energy Development Agency kawa em ha nongbah Shillong yow pyrchang wanrah ya ki Solar Light kamwa 1000 tylli hapoh ka District.
Da pyntip u leh wa hadooh katni ym pu em yoh yei jubab wei da phah biang yei pynkynmoo cha ka Meghalaya Non-Conventional & Rural Energy Development Agency deiwa kular wow chimkhia yeini i kaam.
Ka seiñ da kyntu ko leh ya u Syiemlieh wow wow warah ya ki Solar Light ha ki thaw waphær waphær khamtam ha ki thaw wa lyngam, kiwa doom heipor miet khnang wym em iwon iwon i jia wa sñiawsih ya ki paidbah kiwa lai wa yieñ na kitu ki thaw. Hajrong ini waroh ka EJNC-KU da booh ko leh dei thoh wow kyrpaad ya ki bor District wow chimkhia ya ini i kaam khnang wow em i suk i saaiñ hapoh ka District hi waroh kawi.
Advertisement
