15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Dawa sa ka HWWDO wow pyndam yei thmu lilam ya ka MeECL

Ka seiñ ki manbei kawa tip kam ka Hynniewtrep Women Welfare & Development Organisation (HWWDO) na Ri-loom Jaiñtia da pynsñiaw ki yei phylla hajrong i thmu yong ka sorkar wa yahkhmat daka NPP wow e wai ya ki chnat pynmih bordiñ yong ka MeECL waka MePDCL hadooh 25 snem cha ka Company baar jylla.

Uwa e buit yong ka seiñ u C. Sungoh ong u, “Kamwa tip ka um wa i bordiñ lai ki deilang khamtam ha sor itæ toh lym yoh bordiñ ka um leh ym poi ko, wei la jia wym yoh um ka bordiñ leh ym poi. Neitæ i daw ka um wa i bordiñ toh iwa kongsan tam hei im u bru, kamtæ ini man i i kaam yong ka sorkar wei lada thmu wow lilam ini pynyoo yei wom hoi krehkaam ka sorkar”.

“Heipor wa em i hapoh i synchaar ka Congress thnum wei ong i kamwa em ha kti u thlen, tangwa katni hei synchaar ka NPP won man kamwa haap ha tyndam u khla. Nadooh wa synchaar kani ka sorkar boon su i yakhih, kiwa khih mylla leh hap yakhih, ki Muster Roll leh hap yakhih, kiwa sikai leh hap yakhih, kiwa kamai kari leh hap yakhih wa kiwi kiwi de,” pynrap u C. Sungoh.

Najrong ini da ong haroh u wa yoosar kani ka sorkar toh ka sorkar lilam, yaka MCCL leh dai lilam wei katte saka MeECL/MePDCL leh da thmu dai lilam, wym tip de mynstep mankawi wot yaka ri wa ka jaitbru leh daw dai lilam ki.

Ka O. Suchiang President yong ka seiñ HWWDO ong ko wa i e wai ha kti ki Company baar jylla daw ktah ko chiboon ya ki khian ki dai, kiwa dooh wa duk neibhah wa ka Company ye ko u pynku bai bordiñ næ ah bai bordiñ katwa ngait, iwa booh leh hei maa ya ki wakreh ha kani ka chnat khamtam kiwa kreh haki kaam wa rap khian heiwa ki daw chah ktah ki ha kiwa boon ki liang lada pynlai da ki bru wa na baar.

Kamtæ ka seiñ kyntu wei dawa ko yaki MLA ka Ri-loom Jaiñtia kamjooh ka sorkar khamtam ya ki Montri kiwa em heibor synchaar wym toh u mynjur ki yeini i thmu wym man.

Ka seiñ da maham haroh ko ya ki MLA wym toh u chet kylla ki yaka Ri-loom Jaiñtia kamwa chet kylla ka Agatha Sangma heiyatoh wa ka CAA tangwa u yeiñskem haka yurim hadooh wa jop.

Kiwi won wa emlang ha kani ka sngi kynthup ka Bynta Lyngdoh, Finance Secretary wa ka Z. Thiate kam ka dkhot.

Share this:
Previous

Da pynlait ya u khoo wow saam mynkna ha East Jaiñtia Hills

Next

448 ngut kiwa dang yoh, 507 ngut kiwa chait wa 16 ngut kiwa yap na u COVID-19 ha Meghalaya