Ki ar tylli ki seiñ kitæ ka Khasi Jaintia Youth & Student Union (KJYSU) wa ka Indigenous Biodiversity & Social Welfare Organisation (IBSWO) da e por ki 15 sngi ya ka sorkar MDA-2 wow pyndooh pyndam noh wei wym kheiñ de ya ka Public Hearing yong ka Shree Cement kawa da pynman ha ka 31 tarik u July 2026 ha Daistong, East Jaiñtia Hills District da ka Meghalaya State Pollution Control Board (MSPCB).
Kini ki ar seiñ ha ka 10 tarik uni u bnai da lai e ki dei thoh ha u Member Secretary ka MSPCB, u Dr. G.H. Chyrmang wym toh de u kheiñ ya ka Public Hearing kawa dadep pynman.
Ki ar seiñ da dawa ki wow pyndam ya kani ka Public Hearing hajrong ka yurim wa ka MSPCB ym em boon ryntih ko ya ki kyndon yong ka Social Impact Assessment (SIA). Ym em leh pynbiang yei yukheiñ hadooh katwon u chah ktah kiwa im, ym em ki laad yada ya ki um ki wah, ki tyllong umbaam umdih kamjooh kiwa im ha ki wah deilang ki mrad ki mreng.
Ym ye leh wow pynbiang ki laad yada ya ka mariang wa ka la’ær wei ym ye leh kani ka karkhana wow bood ki kyndon yei kit i bah ya u moochuni wa mih na kani ka thaw.
Ym em leh i pynneh pynsah yei neh slem ki thaw ki bhaw, i khyndaw u chyiap katkam ka hukum wa da pynmih da ka Supreme Court.
Najrong ini ym ye leh wow pynneh pynsah yei chongsuk chong saaiñ wei lai ryntih ka Public Hearing heiwa da mih ki kulmar hadooh i khang luti, i kawang Tear Gas wa i mynsoo hadooh wym yohlaad ki paidbah wow lai pynsñiaw yei sur yong ki.
Da dawa leh wa ka sorkar toh u su ko yei bai lutsan ya kitu kiwa mynsoo ha katu ka sngi wei wow pyndooh pyndam leh chisiendon ya ki Case næ mukotduma kiwa mih na kani ka Public Hearing. Neitæ u kem wei pynchitom katkam ki kyndon aiñ ya kitu kiwa emkti wow tih ya u sarok wei wow su ki ka bai lutsan.
Ki ar seiñ da ong ki wa lada ka sorkar ym ap ko ya kini ki mat dawa yong ki, daw lai pynku yeini i kaam cha ka High Court.
Ya ini i thoh da phah leh cha u Deputy Commissioner, u Superintendent of Police ka East Jaiñtia Hills, cha ka Ministry of Environment Forest & Climate Change wa cha u Chief Executive Member yong ka Jaiñtia Hills Autonomous District Council (JHADC).
Discussion about this post