U MLA ka Amlarem, u Lahkmen Rymbui ynne hapoh ka yung dorbar hawa yaklam hajrong ka mang tangka kawa da wanrah, da kyntu u yaka sorkar wow pyrkhat pynkylla yingkieñ khyndaw-bilat ya ki le tylli ki yingkieñ dieñ wa em hapoh ka Constituency wei da em leh le tylli ki sarok kiwa emkaam yingkieñ neidaw wym lait u lai kari heipor wa slap. Kini ki le tylli ki yingkieñ toh kiwa em hajan ka chnong Kahrkhana.
Da dawa u leh wow pynman yaka Muktapur kam ka Export Zone yow pynduna yei khia kaam ha Dawki wa Tamabil wei daw wai laad ko ya kiwa boon ki bru deilang kiwa em ha East Jaiñtia Hills kiwa wan na sarok Borghat.
Da pynchlur u leh yaka sorkar wow yarap chna pynmiat yaka thaaiñ Sliang wa em ha Amkoi wei da emkaam ya kawi ka yingkieñ kjat neibhah kani ka thaw toh kawa ka-it bha ki bru wa lai uiñke suwari.
Heiyatoh wa i chait i khiah, da dawa u wow pynsmat yei pynku kyrdan yaka Padu Dispensary wei yaka Sub-Centre ha Chyrmang kawa da dep chna da slem wow pynman noh ka kawa krehkaam.
Da pynkynmoo u yaka sorkar wym em de yoh Scheme yow chna ya ki khnap thang-bru wa tip kam ki Eco Friendly Crematorium wei ka sorkar toh u pynim biang ko ya kani ka Scheme deiwa booh bhah ka poisa yow chna ya kini kam ha chnong Chyrmang, Umladkur wa Satpator kiwa da emkaam bha ya kini.
Yow yarap ya kiwa rep saroo, da dawa u na ka sorkar wow pynmih hukum wow pynemkaam da ki saroo wa pynmih napoh ka jylla ha waroh ki yung krehkaam ka sorkar kajooh ki thaw puræ hapoh ka jylla neibhah katni da sdang hiar ka yaaw neidaw wa pynemkaam ki bru da ki saroo wa chna da ki Plastic.
Da dawa leh wow pynku kyrdan yaka Border Road Sub-Division cha ka PWD Division yow yarap yeiwa emkaam ki paidbah ka thaaiñ.
Discussion about this post