Ka All India Trinamool Congress (AITC) da wanrah ko ya ka phang wow dawa pynpsiah ya ka ktien Garo wa Khasi hapoh ka Eighth Schedule ka riti synchaar ka ri deiwa yieñ u MP ka Party hapoh ka Lok Sabha wow klam hajrong ini ynnin ka sngi.
U MP ka AITC, u Sudip Bandopadhyay, da ong u hapoh ka Parliament wa ka Article 29 ka riti synchaar da ong ko wa em kiwa chong chnong ka ri wa em ki yong ki hi ki ktien, ki dak thoh wa ki riti dustur wei em ki yei hok wow pynneh pynsah yeini.
Da kdaw u leh wa hapoh ka Meghalaya State Legislature Act 2005, ya ka ktein Garo wa Khasi da dep wow pynbna kam ki Associate Official Language ka jylla wei kini ki ktien toh kiwa da klam ha kylleiñ ka jylla.
Da ong u leh wa ka ktien Garo toh kawa chibynta ka jait ktien Tibeto-Burmese ka Boro-Jingpko Group, wei da klam ya ka ha Meghalaya, Assam, Tripura, Nagaland. Wei katkam ka Census 2011, da em palat 13 lak ngut (46.5%) kiwa klam Khasi wa 9 lak ngut (31.5%) kiwa klam ktien Garo. Nachwa i daw wym tipmit ya kini ki ktien toh wym em da ki yong ki hi ki dak wa da booh da u warim wajah.
Ha ka 27-09-2018, ka Meghalaya Legislative Assembly da chim ko ya ka rai (Resolution) yow kyntu ya ka sorkar pyrdi wow kynthup lang ko ya ka Khasi wa Garo hapoh ka Eighth Schedule ka riti synchaar ka ri.
