theme-sticky-logo-alt
theme-logo-alt
Advertisement ad1

Daw yahkhmat ka UDP ya ka sorkar hadien ka Election 2023: Pius

Advertisement ad1

U MLA ka Ranikor, u Pius Marweiñ da kob u wa ka seiñ United Democratic Party (UDP) daw yoh ko wow yahkhmat ya ka sorkar hadien ka Election MLA kawa daw man ha u snem 2023.

U Pius Marweiñ uwa ksoh leh kam u District President yong ka UDP South West Khasi Hills District, da ong u leh wa ka UDP daw jop bait ko na waroh ar tylli ki Constituency hapoh ka District kitæ na Ranikor wei kamjooh leh na Mawkyrwat Constituency ha kani ka Election MLA kawa daw wan.

“Nga ym artatien O iyi iyi hajrong ini, neibhah katkam i long i man wa i lai i por, wei hei lai kylleiñ i yong nga, nga da yoo O wa ki paidbah wa chong chnong katni da kyruiñ khmat ki cha kani ka seiñ, kawa man kawi na ki seiñ ri-loom kawa da slem wei kawa mih bha hapoh ka jylla,” da ong u Pius.

Da ong u wa kamwa man katni, ka UDP ym toh kawa khlan du hapoh kani ka District tangwa lyngba ki kaam kiwa da ya kreh khamtam ha kini ki soo snem wow wanrah ya ka roi ka paar, i kyntu ya ka yoh ka kot iwa nangku na kawi ka sngi cha kawi won ha waroh ki District yong ka Khasi wa Jaiñtia Hills wei wot cha Ri-loom Garo leh da yoo wa da sdang wow pait ki khmat cha kani ka seiñ.

“Ym em artatien kajiak leh wei daw jop i boon ngut ki MLA na ka UDP wei daw yoh u synchaar samen lane wow yahkhmat ya ka sorkar ka wow wan,” da ong u Pius deiwa pynrap wa ka yakhun ha kiwa boon ki Constituency u man bait pyrchah ya ka seiñ NPP.

Da ong u leh wa kamwa man katni wei kam uwi na kiwa yahkhmat ka UDP ha South West Khasi Hills District, da kreh chitom u wow lum u lang wei wow pynkhlan ya ka seiñ deiwa pynkhlan ya ki Unit, ki Primary Unit yong ka seiñ lyngba i pynpsiah dkhot na kawi ka sngi cha kawi won.

“Nga em kyrmen skem wa ha ki ar tylli ki Constituency kitæ ha Ranikor wa Mawkyrwat, i jop u man bait yong ka UDP khlem pep,” da ong u Pius.

Hawa kylli, da ong wa kamwa da yoo hi katni ha Ranikor Constituency ym pu ye wow batai katwon ngut u mih ki kyrtong tangwa ka yakhun hi kamwa man, u man bait wa ka NPP.

Kam wow pynkynmoo wa u MM Danggo uwa da chah pynrem noh ha ka Election chiteiñ samoi ha u snem 2018 hadien wa da hiar chuki noh du hadien 6 bnai wa jop u na ka Congress, da dep u wow psiah cha ka NPP tangwa mar ya rem da mih noh u tangwa da psiah biang u cha ka NPP, wei da pynkhreh u wow yakhun biang ya ka Election MLA ha u snem 2023 na Ranikor.

Advertisement ad1
Share this:
Previous

Kammon ha Parliament da ong wym em i pynmih mooyong ha Meghalaya la 4 snem, dawa pynche u George

Next

Dawa u MP ka Trinamool hapoh Parliament wow tipmit noh ya ka ktien Khasi wa Garo