U MLA ka Mowkaiaw, u Nujorki Sungoh hawa e yei klam hapoh ka yung dorbar ynne ka sngi da pynsñiaw u yei kmen hawa sñiaw yeiwa dadep pynbna u Montri Rangbah ka jylla, u Conrad Sangma wow booh ya ka Agriculture College deilang wa ki College neibynta ka Veterinary, Livestock wa Fishery.
Da yooluti u wa hawa pynbna ya kini ki College toh u em kawi ha Jaiñtia Hills ymtoh hapoh ka Constituency u tangwa ha iwon iwon i bynta ka Jaiñtia Hills.
Da ong u wa ini ymtoh du oo samen wa kwah tangwa i kwah ki paidbah ka Jaiñtia Hills neibhah hawa kwah wow lai puræ cha kiwa heh kyrdan da hap bait ki wow lai cha baar ka Jaiñtia Hills chadooh Ri-Bhoi, cha Garo Hills wa cha East Khasi Hills, kamtæ toh u em kawi na kini ki College ha Jaiñtia Hills.
Ha iwi won i liang da pynkynmoo u wa nadooh u snem 2022 oo deilang u MLA ka Jowai da dawa ki wow booh ya ka Superintend Engineering Office ka PHE ha Jowai wei neiliang u Montri ka chnat leh da kular u wow leh yeini tangwa hadooh kattæ ym pu em leh yeini.
Heiyatoh wow chna ya ka Jowai Veterinary Hospital da kawa pura kawa da dawa da slem heiwa da yoh yei kular wow chimkhia yeini tangwa hadooh kattæ leh ym em leh yeini neibhah kawa katni toh kawa da krehkaam na ka yung wa chipor donhi, kamtæ da dawa wow chimkhia ka sorkar yeini.
Hajrong ki kaam uiñke suwari, da ong u wa ka chnong Iooksi da yoh ko hadooh palat 1 lak ngut kiwa wan yooh kjat ha ka du ha ki 2-3 bnai, tangwa iwa em kattæ lait na ka Resort ym em yoh yarap ki kaam pynroi na ka sorkar khamtam u sarok wow lai cha kani ka thaw.
Da pynkynmoo u leh wow pynyoh ya ka Sub-Division ha Laskein Block heiwa i thaw leh da e da ka chnong katwa kwah ka sorkar.
Neibynta ka chnong Mukroh da dawa u wow pynyoh bordiñ kamjooh u sarok neibhah dang em ki bynta wym em sarok hadooh katni.
Discussion about this post