Hajrong ka thong wow pynku yei rep i riang yong ki paaid warep katkam ka juk stat thymme, ka Krishi Vigan Kendra Jaiñtia Hills, ICAR-ATARI, Zone-VII, Umiam, lyngba ka Directorate of Agriculture ka sorkar Meghalaya kawa man kawi ka chnat wa pait yei rep i riang, ynne ka sngi da wai ko ya ka rukom e sikai kyrpang neibynta ki warep wa tip kam ka Viksit Krishi Sankalp Abhiyan ka wow neh kamwa ar tayaaw haroh wei daw kut hadooh ka 12-06-25.
Kani ka Viksit Krishi Sankalp Abhiyan toh kawa da mang da ka sorkar India neibynta u pynyoh sikai chaki 1.5 klur ngut ki warep deiwa em palat 2000 ngut ki Scientist wow e sikai cha ki 700 tylli ki District ha ka ri.
Lyngba kani ka Viksit Krishi Sankalp Abhiyan, ki warep daw yoh ki i pynche bniah hajrong i rukom rep katkam ka buit stat thymme wa chem da ki Scientist nei thooh bniah yong ki, khnang yow ye pynku yei rep i riang wa i psan ya ki jait mrad wa ri.
Ha ka yalang wai ya kani ka Viksit Krishi Sankalp Abhiyan ha pchem ka yung krehkaam ka KVK Jaiñtia Hills wa em chnong Wahiajer, West Jaiñtia Hills da emlang leh ki warep, ka Joint Director of Horticulture, ka B. Mylliemngap kawa da ong wa i sdang ya kani ka Viksit Krishi Sankalp Abhiyan man ko kam ka yingkeiñ wow pynyabi hapyrdi i buit rep stat Science wa i rep ha ki thaw rep.
Hawa klam pynche heiyatoh wa i rukom rep hapoh ka jylla Meghalaya wa kynthup nadooh i emkaam wa i eh i khoo, ong ko wa iwa kongsan dooh wa emkam hei rep i riang toh ka rymaw ka khyndaw wa ka um wa bha wa khooid.
Tangwa haka juk wa katni rap boon hi ym yoh de yeitæ, i daw toh wa da pam ya ki dieñ ki seij, i pynmih yei tngit wa boonjait lyngba ki tdem, ki kharkhana neitæ kylla i man i long ka rymaw.
Ka Director of Agriculture ka sorkar Meghalaya, ka J.C. Lyngdoh hawa klam kam ka kongsan ong ko wow pynku yei rep i riang da pynkupbor ya ki warep lyngba i buit i stat thymme, wei i thmu kani ka Viksit Krishi Sankalp Abhiyan toh yow wanrah i tip i stat wa thymme cha ki warep.
Khana ko wa neiliang ka sorkar katni da thooh laad ko yow pynsuk ya ki warep khnang wa neini chakhmat ym emkam wow kreh ware dei bor i dooh pran, neibhah da boon ki Scheme sorkar wa ki paidbah ye ki u yoh, la heiyatoh ki Subsidy neibynta u thied y aki kor ki bor (Machine), ki laad yarap yow pynbha yei khyndaw wa rep wa riang wa i sikai lyngba ki chnat yong i rep i riang ka sorkar.
Heijooh i por khana haroh ko wa em ka Scheme wa ye ki warep u yoh lada chah pynjŊ pynsih ki mar rep yong ki.
Ha kani ka sngi da emlang leh u Principal Scientist ATARI Zone VII, u Waheh Chnong ka Wahiajer, u S. Laloo, ka Larika Challam Senior Scientist & Head KVK, u Dr. A.K. Singha wa kiwi.
Ha kani ka sngi da pyllait leh ya ka kot lakdop wa ye ki warep u puræ yow tip bniah ki heiyatoh wa i rep i riang katkam ka juk stat thymme.
Discussion about this post