Ka Khliehriat ka Kiang toh kawi na ki thaw em naam em parom u Kiang Nangbah wei man ko leh ka thaw paitke wa yoosuk yookynjai ya ki bynta ka Syntu Ksiar, kamtæ ka Khynroo Khyllood Committee, Seiñraij Jowai dei sñiawkhia yei man kyrpang kani ka thaw, ha ka 27 tarik uni bnai da pynman ko i kreh yonglang hei wow thwat u lum u pynkhooid pynjngiar ya ki soodong sookun kani ka thaw.
Chwa ini hawa wyrchaw yei man kani ka thaw ha ki por wa dadep dalai da man ko ka thaw wa da yap i miat yoosuk na ki khmat wei pyrkhat pyrdaiñ yong ki bru wa wan walai najan najngai neidaw wa da chahtlep i miat yoosuk yong ka hapyrdi ki ranem ki phlang wa rben wa ki jhep ki jakhlia wa boonjait boon rukom.
Neiliang ka Khynroo Khyllood Committee, Seiñraij Jowai hadien wa dadep ko u pynman i pynkhooid pynjngiar, e ko leh ka wyrta chula cha ki khon ka chnong ka Raij kamjooh cha ki lok ki jor wow yakrehlang neibynta wow sumaar, pynneh pynsah yei mankhooid mankyntang ki bynta ka Khliehriat Ka Kiang dei wow yait nei pynemkaam bakla ya kani ka thaw dei wym toh u noh taroi ya ki yusong baam, ki klong um, klong kiad ha i dooh i pran yong ka Khliehriat Ka Kiang khnang wa ini i miat yoosuk, yoophooh yoophieñ u neh i na ki por cha ki por.
