Jowai : Ynne ka 18 tarik ka Seiñ Kynthai ka Dorbar Chnong Chilliangraij da pynman ko ya ka Food Fest kawa ar ha Yungwalieh ka Chnong.
Hachwa wow sdang ya kani ka Food Fest da pynman ya ka yalang wa tbian heiwa ka kong Diwancy Pde, Associate Proffessor yong ka Kiang Nangbah Govt. College, Jowai da man ko kam ka Kongsan.
Ya ka yalang da pyllai da ka kong Samum Pde kawa man leh ka Chairperson yong ka Seiñ Kynthai.
Da yoh yei klam wa tbian na u Oriland Shylla uwa man kam u Secretary ka Sports & Youth Affairs, hei klam wa tbian yong oo da ong u wa i rukom chet ya kini ki jait baam Pnar yong i da emkaam u booh ya ki ha i thoh i taar kamwa leh kiwi tawan ki jaitbru ka pyrthai, khnang wa i rukom chet yong i kamjooh wa bang yow neh yow sah i na kawi cha kawi ka pateiñ.
Da yoh leh yei klam na u Cheini W. Niangti u waman u Chairman ka Sports & Youth Affairs, hei klam yong oo da yaroh wei da e mynsien u ya ka seiñ hei wow nang ye ko u pynman ya ka ni ka jait program kawa pynlum pynlang ya ki khon ka chnong.
Ka kong Dewancy Pde kam ka Kongsan da yaroh ko yei kaam yong ka seiñ, wei da ong ko wa emkaam u thooh laad heiwa kammon u yarap ya ki khon ka chnong heiliang i puræ puthi khamtam kiwa duna tymbuiñ.
Ha kani ka Food Fest da wan yachim bynta da ki khon ka Chnong kamjooh ki lok ki jor heiwa da yathied ki ya ki baam wa boonjait kiwa da pynkhreh na ki kyntoit waphær yong ka chnong. Yei kyntien khublei da e da ka kong Malbareen Nikhla kawa man kam ka Secretary yong ka seiñ.
Discussion about this post