Kam chibynta wow lehkmen leh sñiawbha yow pynem warom ya ka Kopati Puja ka wow man ha ka 28, 29 wa 30 tarik uni u bnai, ka Seiñ Raij Raliang da pynman ko dei kreh yonglang ynnin ka 15 tarik heiwa ki khon Niamtre dei ka’it da mih ryntihlang ki nadooh ki manbei, ki manpa, ki khynroo khyllood hei wow pynkhooid pynjngiar ya ka Madan Seiñ Raij Chrah Umphula, ya ki luti syngkieñ nadooh Lad Club Luti Baam Yangkhat, Loomthangbru, Loom Chaad Ksohtympong wa u Loom Mowtylleiñ Park.
Chooh chooh kam wow pynphooh pynphieñ ha katai ka sngi da chimbynta chongchit ki khon Niamtre wow puchara chuni nadooh na yung Seiñ Raij chadooh i Yung Blai u Wamon kam ka dak wow pdiang ya ka Kopati Puja ha uni u snem.
Kamtæ ka Seiñ Raij Raliang lyngba u General Secretary yong ka, u Hamjhan H Dkhar chim ko kani ka laad wow e khublei Kopati Puja wa suk wa kmen ya phi waroh ki khon Niamtre hapoh ka Ri Khad-Ar Dolloi, Lephaw Syiem wa e wa kani ka Kopati Puja u thæh ko i kyrkhu kyrdoh ya phi, u man khih wei khan, u dap u kyllep sdep ka yung ka sem liang wanang, khamtam ha ka sngi 29 tarik u November ka sngi Pamblang, ka sngi wow Pastieh wow chaad u kmen ki khon khynroo khyllood, u chkeh ki kti, ki kjat, i tyrpeiñ i tympha, kamjooh leh u ye ki u leh bha ha ki Exam waphær waphær u yoh ki u Pass bha na kawi ka Class cha kawi, khnang u man ki sahep saba hapoh ka Raij ka Elaka, ka hima ka ri waroh kawi.





Discussion about this post