Jowai: Yow pynsñiawthooh ya ki bru wa chongdai kamjooh kiwa wan yaw hajrong i emkaam wow pynneh yei khooid i jngiar ka Iawmusiang, ka Seiñ Khynroo yong ka Dorbar Chnong Tympang Iawmusiang ynne ka sngi da pynman ko yei lai paidbah deilang i rah Placard hapoh u pood u ang yong ka wada chimbynta kynthai wa chynrang.
Heini i lai kjat da kbai kyntu kyrsu haroh ki ya kiwa chongdai kamjooh kiwa wan yaw wow man kiwa em i kitkhlieh katni neibynta i chait i khiah ka imlang sahlang mynstep mankawi, neitæ khut ki leh yei ya krehlang yong waroh yow lehkhooid yaki soodong sookun.
Hei yaklam wa u Assistant Waheh Chnong u Latu Nartiang, da khana u wa i krehchitom yong ki neibynta u pynneh yei khooid i jngiar da lai luti ki la kamwa kattu katni bnai. Kamtæ kyntu u yaki paidbah wow pynneh ki yei khooid wym toh u noh taroi yei jhep, tangwa toh u noh haki thaw wada pyntip ka chnong.
Neiliang u Chairman ka Seiñ Khynroo u Raja Passah won ong u wa nachwa kani ka yaw taroi bha ko, tangwa katni la kamwa 40% da ye ki wow pynkhooid yaka. Neitæ nalor i angnood ki wow pynkhooid ya ki chnong ki thaw, ong u wa dang em chooh i thmu yong ki neini chakhmat kam ki khynroo itæ toh wow pynyait ya ki jhep wa man sboh wa ki wym ye u man sboh.
