Hadien wa ka chnat Tourism da pyndam ko yeiwa da mynjur wow chna yaka Entry Point/Facilitation Centre wa em ha Umling, Ri Bhoi, da mih leh yei pyrchah na ki seiñbhalang kiwa da ong wa ka sorkar ym em chimkhia ko ya ini i kaam wow booh khyrdop yow pait yei psiah i mih chapoh ka jylla.
Ynne ka sngi neiliang u Montri Rangbah ka jylla u Conrad Sangma da pynche u wa ka sorkar hi ka ym em mut ko wow dam u chna ya kani ka Entry Point wei yei daw wa da pyndam yaka mang poisa (Sanction) warim toh wa daw chimpor hadooh chi snem chiteiñ wow chna ya kani ka khyrdop kamtæ da emkaam wow mang poisa da kawa thymme neidaw wa jhan wow booh ya kani ka khyrdop khamtam ha kini ki por wa dang em ka khlam wei ya kawa dang thymme toh da kawa da dep chna chwa (Pre-Fabricated) kawa daw yieñ hapoh ka 60 sngi.
Neiliang ka chnat Tourism leh da pyntip ko wa da pynmih yaka mang poisa namo ka New Sanction haka 29 tarik u Naikhynde yow chna yaka Facilitation Centre (Entry Point) ha Umling.
Kani ka (Pre-Fabricated Facility) u chna yaka pyn ha i thaw sorkar hi iwa man leh i yong ka Transport Department iwa da dep chwa wow pynmadan yei thaw.
Ka chnat da ong ko leh wa kani ka thaw thymme u man ko leh kam chibynta ka COVID-19 Screening/Testing deilng waka Facilitation Centre (Entry Point).
Da yooluti wa yei chna ya kani ka Facilitation Centre (Entry Point) ha ini i thaw wa thymme daw ye u pyndep hawa kut u Khonchonglad (Nov) wei u sdang ko u krehkaam nadooh u Kmaichonglad (December) 2020.
Chooh chooh da ong wa i daw wa da pyndam yei thmu wow chna yaka Facilitation Centre (Entry Point) i warim toh neidaw wa chim por kamjooh wa syad nadooh i thaw hadooh wow chna, da pyntip u Commissioner and Secretary Tourism Department.
