Ka seiñ EJNC da kynmoo warom ko ya ka lyngkhooh sngi yap wa 159 yong U Kiang Nangbah deiwa pynman da ka lai paidbah nadooh na madan Khliehriat Higher Secondary School chadooh u mot sahnaam yong U Kiang Nangbah wa em ha pchem ka yung krehkaam u DC, Khliehriat ynne ka sngi.
Ha ini i lai paidbah da kbai da ki kyntien kynmoo warom yei pyrtuid u Kiang Nangbah deiwa kbai phah khang dukan yong kiwa na baar.
Ha chwa wow booh syntu kam i dak kynmoo warom ya uni u khlawait ka ri, da em ka yalang wa tbian hajrong ka phang pyrdi “Ham man ki suri kup snieh langbrot” heiwa ya ka yalang da pynlai da u Nangjan Dkhar, General Secretary EJNC-CEC.
Da yoh leh ya ki kyntien pdiang burom na u Ency Shadap, da yoh leh yei klam maitphang ya ka phang pyrdi da u Mebantei Sukhlaiñ, General Secretary EJNC-Khliehriat Circle.
Kiwa klam ha katai ka sngi kynthup ki ya u Lektor Dkhar, President EJNC-Khliehmyntriang Unit, u Jersom Shylla, President JSU-CB, ka Bythygrace Dkhar, President HANM-Women’s Wing wa na u Sambormi Lyngdoh President EJNC-CEC.
