Ka Behdieñkhlam 2026 ka Raij Jowai ynne ka Sngi Musiang ka 8 tarik da man ko ka sngi wa le yong ka lehniam heiwa dang step da pynyieñ ya ki Dieñkhlam ka Bon ha yong Rngad Wah, ka Doh ha Yung Langdoh iwa pynbood ya ki Dieñkhlam khian ha man la ki thyndai yung wei hadien ini, ki Khonraij da mih ki wow lithooh ya ka Symbood Khnong yow pynyieñ ya ka ha Khliehchnong.
Ha Yung Blai won, u Dolloi da pynkhreh u yei pyrnah wei da e kti ya i pyrnah da ka Kchu Ka Siang ka kur Kynjing ha u Sangot Paswet wow suit u choor ha ka Khnong Blai ha Madan Pohsawiar.
Mar chimkti yei pyrnah da mih u Dolloi, u Sangot, u Maji wa kiwi ki Wasan wow lai cha Mynkoi Pyrdi, Loompyrdi Iongpiah heiwa ki Kmai Raij da yachemlang ki wow pynkhreh u lithooh ya ki Dieñkhlam heiwa da em ka yalang wa tbian kawa da pynlai da u President ka Seiñraij Jowai, u H. Toi wei da yoh i klam na u Dolloi ka Elaka, u Puramon Kynjing.
Manda kut kani ka yalang da lai ki cha Iawmusiang wow rah ya ki Dieñkhlam heiwa da chaad leh ha waroh ki thaw lehniam ka Raij kam ha Biar ka Blai, ha Datlawakor, ha Madan Siat-Thong wa kiwi kiwi ki Thaw Niam ka Raij.
Wot hapyrdi u slap wa hiar, ki khon ka Raij da chaad ki dei mynsien wa ka-it wei maya Blai hei kieh ka bom, bhuri wa bikur.
Hadien wa da pynpoi ya ki Dieñkhlam ha Madan Siat-Thong, ki Khonraij da lai li thooh ki ya ka Khnong Blai na Loom Sooiung yow rah ya ka cha Madan Poh-Sawiar.
Manda poi ha Madan Poh-Sawiar, u Dolloi da e u yei ngooh i dem wei da e kti u yei pyrnah Khnong Blai ha u Kñi ka Kur Nikhla wow e u i ngooh i dem wa i suit i choor ha ka Khnong Blai yow e ngooh ya ki Blai ki Syiem wei manda dep neini ki Khon ka Raij da rah ki jar jiar ki Dieñkhlam cha Biar Ka Blai hadooh wa poi jar jiar ki chnong yong ki yow pynyieñ ya ki Dieñkhlam.
Discussion about this post