Ynne ka sngi kawi ka karkhana chna sarok na nongbah New Delhi, ka Verma Industries da pyrchang ko wow pynchna deiwa pyndap ya ki thlu (Potholes) wa em ha ki sarok deiwa pynemkaam da i psiang POTSEAL ha i bynta yong u sarok hajan Madan Daimasi, Ladthadlaboh, Jowai.
Ha kani ka sngi da wan sakhi leh da ki sahep na ka chnat PWD.
Hawa yaklam wa u Vara Prasad, Senior Product Manager kani ka karkhana da pyntip u wa ka Verma Industries toh kawa da tipmit da ka sorkar jylla Meghalaya lyngba ka chnat PWD kawa dai psiang (Bituminous) cha kani ka chnat.
Da khana u wa i psiang POTSEAL toh iwa dadep khleh chwa (Readymix Bituminous) iwa suk wow pyndap ya ki thlu ha ki sarok wei ini i psiang toh iwa da mang kyrpang ya ka Meghalaya kawa joor u slap wei kjam.
Chooh chooh da ong u wa i dor yong i POTSEAL toh iwa toh neibhah ym emkaam bru wakreh kamjooh leh ki tiar wa ki kor wa heh wei ini toh katkam ka SOR (Schedule of Rate) ka chnat PWD wei ym ktah i ya ka rymaw kamjooh leh man iwa neh slem.
Ini i psiang POTSEAL ye u yoh ha ka churia wa khia 25 kg wei i dor man i T. 550 chi churia wei ya ini i psiang ye leh u pynemkaam da ki bru samen wa ha ki thaw samen.
Heijooh i por da ong u wa ynne toh man i wow pynyoo nongmuna (Demonstration) donhi wei daw tyrwa leh ya ini i psiang ya ka sorkar Meghalaya kamwa leh cha kiwi ki jylla.
