Ka yung krehkaam ka District Hub for Empowerment of Women (DHEW), Jowai kawa em hapoh ka Department of Social Welfare chirup wa ka District School Education Officer, West Jaiñtia Hills da lehkmen ko ya ka Children’s Day ynne ha District Library Auditorium, Mynthong hapoh ka phang ‘Beti Bachao’ wa ka Wyrta wa ong “The Children of today will make the India of Tomorrow” namo ki khynnah wa katni u pynwandur ki ya ka India wa mynstep, heiwa u MLA ka Jowai uwa man leh u Chairman ka Meghalaya Urban Development Authority, u Wailadmiki Shylla da man u kam u kongsan.
U Wailadmiki hawa e i klam da e khublei Children’s Day u deiwa ban joor wa i puræ puthi, i raikut, i minot toh iwa emkaam heiwa da pynchlur u ya ki khynnah wow ngait skem ki pyn ya ki hi.
Da kdaw u ya ka “Beti Bachao Beti Padhao” heiwa i puræ puthi toh iwa emkaam bha ya ki khynnah kynthai deiwa yaroh ya ka DHEW wa pynman ko ya kani ka lehkmen.
Chooh chooh da kyntu u ya ki khynnah wow chim kabu yei myntoi wa yoh ki deiwa bood ya ka nongmuna kiwi deiwa kitbok leh ya ki khynnah ha ki Exam wow wan.
Ka B. Blah, Additional Deputy Commissioner, Jowai da klam ko yei man kyrpang ka sngi heiwa ka 14 tarik u Khonchonglad toh ka sngikha u Prime Minister wa nyngkong ka ri, u Pandit Jawaharlal Nehru uwa chynna jngai ya ki khynnah heiwa emkaam wow maya, burom wei wow wai luti ya ki waroh.
Ka A.P Syiem, I/c District School Education Officer, Jowai wa ka Y. Najiar, District Social Welfare Officer District Nodal Officer DHEW, Jowai, da e ki ya ki kyntien wow pynchlur ya ki khynnah wow kynjoh ki wow man kiwa tyrchaaiñ mynried.
Ka S. Lakiang, kawa man ka Ambassador ka Beti Bachao Beti Padhao, DHEW WJH, da khana ko ya ka parom yong ka heiwa da khana ko wa da chimbynta ko ha ka WFF India 2023 wa Mr & Ms East India 2023 Zonal Body Building & Fitness Champion wa da pynman ha Ranchi Jharkhand wei da khana ko yeiwa jop ko ha ka Mr and Mrs India 11th National Body Building & Fitness Champion 2023 ha R.B. Dangayach Auditorium, Jaipur Rajasthan.
Hawa pynchlur ya ki khynnah, ka S. Lakiang da batai ko yei myntoi u chimbynta ha ki Sports neibhah pynkhlan i ym du yei doh i pran tangwa wot i bor pyrkhat leh kamjooh.
Ha kani ka sngi da pynkupburom leh ya ka S. Lakiang wa kiwi ki khynnah wa da paw khmat ha ki Sports wa i puræ puthi.
Kiwa chah pynkup burom kynthup ki ya ki khynnah ka North Liberty Higher Secondary School, Jowai kam u Eriliting Pohshna (Class 10B), u Banteilang Sumer (Class 6) wa u Idamaya Pyrtuh (Class 9B) kiwa da chimbynta ha ka Junior Boys National Football Championship kawa tip leh kama ka Dr. B.C Roy Trophy 2024-25 ha Narianpur, Chhattisgarh.
Kiwi ki khynnah ka North Liberty Higher Secondary School, Jowai toh ka Deigracia Dan (Class 10B), ka Eiladki Ksoo (Class 9B) kiwa da chimbynta ha ka Junior Girls’ National Football Championship 2024-25 ha Belgaum, Karnataka.
Ka Nihaka Lamare na St. Mary Mazzarello Girl’s Higher Secondary School kawa da lehbha ha ka 5th Meghalaya Games ha Tura, Meghalaya, ha ka Yonex-Sunrise North East Zone Inter State Badminton Championship-2024 ha Guwahati, Assam wa ha ka 39th Meghalaya State Badminton Championship 2024 ha NEHU Campus, Mawlai, Meghalaya.
U Hameki Dhar na Government Boys Higher Secondary School uwa da lehbha ha ka Boys Judo ha ka 68th National School Games 2024-25 wa man ha Jammu, India.
U Ioh I Ksan Lyngdoh na Government Boys Higher Secondary School wa lehbha ha ka Athletic (200 meters) Boys wa ha U-17 67th National School Games 2023-24 ha Patna, Bihar.
Ka Kongka Dkhar na Jowai Presbyterian Higher Secondary School, Jowai kawa lehbha ha ka XXI Meghalaya State Level Wushu Championship 2023, ha ka 27th Meghalaya State Level Kickboxing Championship, ka AITWPF 12th National Traditional Wrestling & Pankration Championship 2024 wa ha ka 9th Meghalaya Jeet Kune-Do State Level Championship 2024.
U Mar Emdor Kini Sutnga na KJP Presbyterian Synod Mihngi Higher Secondary School, Jowai wa lehbha ha ka U-16 Boys Vijay Merchant Trophy, BCCI Domestic Cricket Tournament 2023-24 ha Cuttack wa Jamshedpur.
Da pynkup burom leh ya u Dauniwan Sajem na Shangpung Presbyterian Higher Secondary School, Shangpung wa ka Hakiru Challam na St. Mary Mazzarello Girls’ Higher Secondary School, Jowai wa lehbha ha ka SSLC Exam.
U Fredrique Gweneth Ryngkhlem na North Liberty Higher Secondary School, Mookyrdup, Jowai wa ka Monkynjailin Syngkon na St. Dominic’s Higher Secondary School, Mawkyndeng kiwa lehbha ha ka HSSLC (Arts) 2024.
U Weibha Nongtdu Lakiang na North Liberty Higher Secondary School, Mookyrdup, Jowai wa u Joshaviah Onan Paswet na North Liberty Higher Secondary School, Mookyrdoop, Jowai kiwa da lehbha ha ka HSSLC (Science), 2024.
Ya ka yalang da pynlai da ka S. Meliora Lamare, Gender Specialist DHEW katwa u F.G.N Ryngnga, DHEW, Jowai da e u ya ki kyntien khublei.
Discussion about this post