Ynne ka sngi ka MDC ka Narpuh Constituency, ka Deiwi Tongper da lai yachem ko wa ki In-charge yong ka Ratacherra Infiltration Police Check Post neibynta wow kyntu ya ki wow pait sylli bha ki yei wan psiah ki baar jylla kiwa wan chapoh Meghalaya hadien wa chah beh na Assam ha ka Eviction Drive yong ka sorkar Assam.
Ka Deiwi da yoh ko leh u yaklam wa u 2nd In-charge yong kani ka Check Post wow ya phyllu yumut hajrong kammon u krehlang neibynta u wanrah ya ka chong chngaaiñ ka jylla khamtam wa kani toh ka thaaiñ wa em ha National Highway wa pynyabi ya ka Assam wa ka Meghalaya.
Neiliang ka Deiwi da kyntu joor ko ya kiwa kreh heini wow pait bniah ya ki kot ki sla yong ki baar jylla kiwa wan kamjooh leh wow pynuiñ biang ya ki wym em kot em sla wow pynsakhiat bha wa ki toh kiwa chong chnong ka ri India.
Neiliang kiwa kreh kani ka Check Post da khana ki wa da sylli ya ki bru wa wan na Assam lyngba ki EPIC, Aadhaar wa ki Birth Certificate neibynta ki khynnah khian yow pynsakhiat wa ki toh kiwa chong chnong wa pura ka ri India.
Discussion about this post