Ka Jowai Diocese deiwa ya ksohktilang wa kiwi ki Parish deilang ki para wa ngait ka St. Theresa Cathedral Church ka Jowai Parish da yalang ki ha loom tlep-bru ka balang ha Jowai yow kynmoo tympang yei mynsien kiwa da khlaad kam chibynta ka All Souls’ Day ynne ka sngi.
Ya kani ka yalang wa kyntang da sdang deiwa pynman ya ka Holy Eucharistic Mass wa yahkhmat da u Bishop Rev. Fr. Ferdinand Dkhar wow duwai neibynta ki mynsien kiwa da khlaad kiwa da pynthiah ha kani ka thaw.
Ya u Bishop da synraan da u Rev. Fr. Augustine Lamin, ki Brother, ki Sister wa ki waheh ka Balang hei wow ya duwai yow yoh ki mynsien kiwa da khlaad yei kyrkhu deiwa emlang leh kiwa ha-yung ha-sem kiwa da duwai lang neibynta ki payu para, ki khon ki kti, ki bei ki pa kiwa da dooh noh ki.
Katkam i ngait ki khon ka Balang Catholic, i mynsien kiwa khlaad lai ki cha le tylli ki thaw. Kiwa yap khlem em i leh pap wei im katkam wa da booh u Blai lai ki cha bnieñ. Kiwa da joor i pap ki wym em pynkylla yei rukom im bakla yong ki lai ki cha dujok. Kiwa em ha pyrdi won poi ki cha ka Diñ Pynkhooid (Purgatory) heiwa da ngait wa boon kiwa khlaad neh ki ha ini i thaw.
Ka Diñ Pynkhooid toh kawa emkaam yow pykhooid yei pap kiwa da khlaad chwa wow psiah ki cha bnieñ. Kamtæ kiwa ha-yung ha-sem da wan ki ynne ka sngi yow rwai yaroh ya u Blai, u duwai, u thang mombati wei da pyndep leh ya ka kñia Mass wakhooid neibynta kiwa da khlaad yow pynkhooid ya ka luti yong ki cha bneiñ.
Discussion about this post