Dei yakob “Chaad Kpær Syntu” pynkut ka Seiñraij Jowai ya ka sngi Chaad Sukra

Hadien wa ka Seiñraij Jowai da pyndep ko ya ka Chaad Sukra ha ka 6 tarik deiwa ya chaad lehkmen deilang ki sur rwai wa da chna ha jar jiar ki yumut kiwa yatoh wa ka bei rymaw, heipor miet won kamwa jooh leh hi man-u-snem da em ka yakob “Chaad Kper Syntu” wa da chimbynta da ki chijur wow pynyoo yei sap chaad wei da wan sakhi da kiwa boon ki khon ka Seiñraij.

Kani ka Chaad Kpær Syntu man ko chibynta i pynkut ya ka sngi Chaad Sukra, heiwa ha uni u snem da mut pynman ha Madan Ryngkaw, Tpep-Pale tangwa da pynman noh ha Yungwalieh ka Dorbar Chong Loompyrdi Iongpiah neidaw wa joor slap wei haap phria nadooh i sngi.

Ha kani ka yakob chaad da pynwyrngia leh dei rwai wa da chimbynta u rwai da kiwa rwai wa bna naam kiwa da rwai leh ya ki sur Chaad Sukra.

Wei napyrdi ki 8 tylli ki Dorbar Chnong wa haap hapoh ka Seiñraij Jowai da jied le jur kam kiwa jop, heiwa ka Dorbar Chong Loompyrdi Iongpiah da yoh rah ko yei naam wa nyngkong, wa ar ka Seiñ Tyllilang Ñiamtre Ladthadlaboh katwa he wa le won da yoh ka Dorbar Chong Panaliar.