Dei yung pynchna ka Pynbha VO ya kawi ka manyung wa dooh wa duk

Ka Pynbha VO yong ka chnong Pammanik kawa em hapoh Laskein Block kawa em hadooh 44 tylli ki SHG kiwa da seiñ da ka Meghalaya State Rural Livelihood Society (MSRLS, BMMU Laskein Block), ha ka 29 tarik uni u bnai da yoh ki wow e kti yei yung wa da pynchna ya ka Iowanka Pakma kawa man ka dkhot ka SHG yong ka Iahluti SHG kawa man kawi na ki dkhot wa dooh tam hapoh ka chnong wei kawa em ar ngut ki khon.

I yung yong ka Iowanka toh dei yung trep iwa khian wei iwa chitom bha u sah heipor wa slap, kamtæ ka Pynbha VO hadien wa yoo ki yeini i eh da rai ki wow kreh chitom u thooh luti wow yarap ya kani ka manyung kawa da maad yeini i eh.

Nadooh wa sdang u chna hadooh wow dep yeini i yung dapoi i lut hadooh Rs.1,05,200 wei yeini i lut i sep waroh da pynlut hi da ka VO deiwa ya krehlang waroh ki SHG kiwa em hapoh ka VO deiwa e yarap kyllooid leh da ki kattu katni ki waheh.

Kani toh ka sien wa ar hapoh chi snem tam wa ka Pynbha VO da yoh ko wow e kti sa kawi ka yung wei ha kani ka sngi da pynman ka yalang ha pchem yung ka Iowanka deiwa pynlai ka Facility Dhar, Persident yong ka VO wei hachwa wow sdang ka yalang da yoh i duwai na ka Justmin Amanda Talang wei da yoh leh i klam pdiang na ka Shiioni Talang neiliang ka VO.

Related posts

Ebuit ka JYF ya ka JHADC wow sdang u kreh katkam ka juk wa katni wow suk ki paidbah

April 23, 2025

Chongdor kawi ka khroh na Assam hadooh Rs. 100-150 ha Meghalaya

April 23, 2025

Da yoh leh yei klam tbian na u Teibor Talang uwa man kam uwa sikai wei neiliang ka VO da klam da ka Nehipaia Talang, u CFS Khonglah neiliang ka Office BMMU Laskein wei da yoh leh yei klam na ka Iowanka Pakma kam kawa pdiang ya kani ka yung.

U kongsan ha kani ka sngi toh u M. Suchiang, Gram Sevak Laskein C&RD Block heiwa waroh kiwa klam da e ki yei yaroh ya ka Pynbha VO yeiwa kreh chitom ki wow yarap ya kani ka manyung kawa dooh wa duk wei da kitbok kit rwiang ki ya ka Pynbha VO wow nang kreh chitom chooh chooh neini chakhmat ya ki kaam wa bha yong ka.

Da pynphooh pynphieñ ya kani ka yalang deiwa chimbyntalang ki SHG, ka Balang CNI, ka seiñ HITO, ki dkhot yong ka chnong wa ki dkhot ka Soo Iukit CLF wei da yoh leh yei chaad pliang na ka Iahluti SHG.

Ya ki kyntien khublei da e da ka M. Talang, EC member ka VO.