U Superintendent of Police ka East Khasi Hills, u Vivek Syiem da khana u wa 6 ngut ki bru da mynsoo ki wa kynthup ya 4 ngut ki pulit kynthai wa 2 ngut ki bru paidbah hei kynaad ha ka chnong Mawkynrew iwa da jia hei step ka 20 tarik.
Da khana u wa hadien wa da pynkrehkaam ya ka Curfew ha kani ka thaw waroh kawi, da phah chooh chooh sa kamwa 30 ngut ki pulit wow sonteri ya kani ka thaaiñ najrong ki pulit kiwa da lai chwa cha katai ka thaw nadooh i por step.
Da pyntip u wa ki pulit daw Register Case ki ya kiwa yahkhmat wow pyrchah yei chna ya kani ka skur ka Ram Krishna Mission ha Mawkynrew, deiwa pynrap leh wa hadien wa da ujor FIR daw chim ya ki bru wa emkti katkam ka aiñ.
Katkam wa khana u SP, da ong u wa ha ka 19 tarik ki pulit da yoh khubor ki wa ka Executive Committee yong ka chnong da khut yalang ko wei ha katai ka yalang da khut ya ki paidbah wow mih ki hei step ka 20 tarik nadooh 9:00 waje i step yow pyrchah yei chna ya kani ka skur.
“Ki pulit da lai ki cha katai ka thaw nadooh i step wei da khang ya kini ki bru wa em kamwa 250 ngut kiwa thmu wow toor cha ka thaw chna skur. Wei da em i kynaad malu mala wei da em i mynsoo malu mala leh ya 4 ngut ki pulit kynthai wa 2 ngut ki bru paidbah”, da khana u SP.
Da ong uwa neidaw wa ini i yaleh pyrchah, ki pulit da hap ki wow khyrwit lathi leh malu mala yow khanglaad yei thmu lai toor cha ka thaw chna ya ka skur, wei da hap kawang leh da ki Tear Gas.
U Vivek da ong u leh wym ye wow sñiawthooh iyi mut ki paidbah wow lai tympra yeiwa da chna ya katai ka skur wei wow lai seh ya ki dieñ kool ha katai ka madan, neibhah ini i kaam wa yatoh wa i mantre ya katai ka thaw dang em ko hapoh i bichaar.
Da ong u wa hei yong sakhiat da em i yasoi mynjur wow e yei thaw da ka Mawkynrew waka Mawleiñ, tangwa kattæ won da pyrchah ki wow e yei thaw cha ka Ram Krishna Mission.
Discussion about this post