Ka NEHU-Deen Dayal Upadhyay Community College for Skill Development, wa em ha Wahiajer, West Jaiñtia Hills District kawa man ka chnat chlem puræ yong ka Northeastern Hills University (NEHU), Shillong, ha ka 25 tarik da pynkut ko yei e sikai soor, sikai thaiñ wa 6 sngi kawa da sdang nadooh ka 19 tarik uni u bnai wa tip kam ka “Handmade Knitting & Embroidery”.
I pynkut ya kani ka e sikai man i leh kam chibynta i kynmoo warom ya ka lyngkhooh sngi kha wa 108 snem u (L) Pt. Deen Dayal Uapdhyay uwa man uwa yahkhmat heiyatoh wow pynpliah yei sap i phong.
Wei i jop kani ka e sikai toh wa u Prof. P.S. Shukla, Vice-Chancellor ka NEHU kamjooh ka University hi waroh kawi wa em ki i angnood wow pynku yei sap i phong ha ki bynta waphær waphær deiwa pynkupbor ya ki khon khynroo khyllood khnang yow ye ki u yieñ hei yong ki hi ki kjat neibynta u kamai kajih.
Lyngba ini i chah sikai, kiwa chimbynta da tip ki kammon u soor wei thaiñ pynwandur ya ki muja, ki sula, ki that, ki muna, ki tupri wa kiwi kiwi wei ya kini da pynyoo rong leh ha kani ka sngi.
Ha kani ka sngi pynkut yei e sikai kamjooh leh i kynmoo warom ya ka sngikha wa 108 u (L) Pt. Deen Dayal Upadhyay, da emlang u Col. Omkar Singh (Retd), Registrar, NEHU kam u kongsan, u Prof. H. Lamin (Retd) Founder Principal I/c, DDUCC, kam u symbood kongsan. Wei waroh ar ong ki i sap wa kam kani man ko leh chibynta ka riti dustur hapoh ka ri.
Neitæ hawa klam e mynsien kyntu haroh ki wow man kiwa yakrehlang ha kawon kawon ka bynta, wow chimkhia yei kaam ym wow ong wym ye u leh.
Hawa pynkynmoo ki yei im i man u (L) Pt. Deen Dayal Upadhyay, kyntu haroh ki wow bood ya ka nongmuna yong oo, neibhah hanla toh u bru wa maad boon i eh i khoo leh poi bait u cha ka thong dei minot wei kreh chitom.
U kongsan pyntikna haroh u wa neiliang ka NEHU daw pteiñ ko u e kyrchaan ya ki paidbah wa chong chnong khnang yow nang ku ki.
Ka Principal ka Deen Dayal Upadhyay Community College, ka Prof. S. M. Sungoh, u Dr. F. R. Sumer, Librarian, NEHU, u Sanwotki Laloo, waheh chnong ka Wahiajer da pynsñiaw ki hajrong i mahajon wei man kyrpang i kaam soor wei thaiñ ha ka ri india. Wei ong ki leh wa dei yarap ka juk stat wa katni nadooh i rukom pynlai yaaw, i kaam soor wei thaiñ (Knitting and Embroidery) ha India yoo em kyrmen hi wot haka pateiñ wow wan.
Da pynchongchit ya kani ka sngi dei rwai, i chaad waphær waphær wa da chimbynta da ki khynroo khyllood wa chah sikai wa lai puræ ha kani hi ka Community College, wei da pynkut dei klam e khublei na u Wolnish Rymbai, Programme Coordinator ka Deen Dayal Upadhyay Community College.
Discussion about this post