Ynnin ka sngi ka Dorbar Chnong Mooshrot da pynemwarom ko ya lyngkhooh 75 snem i yoh laitlooid yong ka ri India deiwa chimbynta lang ki skur waroh hapoh ka chnong kitæ ka Chankylliang Evergreen School, St .John LP & UP School, Radep LP School, Presbyterian UP School wa ka Iasylloklang Village Organisation deiwa emlang ki waheh wasian yong ka chnong wa kiwa chong chnong hi waroh.
Ha kani ka sngi u MDC ka 13-Saphai Constituency, u Habahun Dkhar da man u kam u kongsan katwa u Gilbert Sten kam u symbood kongsan hei emlang u Founderson Syngkon, u Rangdamon Dkhar, u Duki Ymbon, Waheh Chnong Sahsniang-A, u Franky Lyngdoh kiwa man ki waheh chnong warim yong ka chnong.
Ya ka lehwarom da sdang deiwa pynhær ya ka lama yong ka ri da u K.J. Muiai uwa kitkaam warim ka chnong, ya i kyntien pdiang burom da yoh na u waheh chnong u Romis Lamare, da pynman leh ya ka March Pass wa ka Drill Display da ki khynnah skur wa ka VO.
Ka Dorbar Chnong da pynkup burom ko leh ya ki waheh chnong warim waroh wa ya kiwa e buit wei da pynkup burom ya ki da u Habahun Dkhar wa u Gilbert Sten.
Da e leh ya ki pynwyrngia wa kyrpang chaphang i yoh laitlooid da ka VO wa ka St. John UPS.
Neiliang u Habahun Dkhar da pynlait paidbah u ya ka Ambulance neibynta wow chakri ya ka chnong waroh kawi ya kawa daw pynlai da ka Mooshrot Sport & Welfare Club. Kani toh ka Ambulance kawa soo wa da pynlait paidbah u MDC ka Saphai Constituency.
Hadien da yoh i klam na u Chanky Lyngdoh, Adviser yong ka chnong uwa man leh u General Secretary yong ka Mooshrot Sport & Welfare Club, da kyntu u ya kiwa chong chnong wa kamwa laitlooid ka ri u man kiwa ya tylli hapoh chnong poh thaw wa ha ki kaam ki jaam.
Da e leh yei klam da u Gilbert Sten, uwa da pynsñiaw yei yaphær ka Independence Day wa ka Republic Day.
Ha kani ka sngi da e leh ya ki khusnaam cha kiwa jop ha ki yakob waphær waphær. Ya i naam Best March Pass Contingent da yoh da ka St. John UPS, Best Drill da ka Chankylliang Evergreen LPS, Best Discipline da ka Presbyterian UPS.
U kongsan hawa e yei klam da yaroh u ya kiwa chong chnong wa kreh chitom wei wa em ki i yatylli, da ong u leh kam wa yaleh u Mahatma Gandhi wow yoh laitlooid ka ri deiwa jai-jai, i leh toh u leh ya ki kaam wa bha, dei maya wei yatylli ha ki kaam, ha i khih i kreh wa ha ka imlang sahlang.
Da kyntu u leh ya kiwa chong chnong wow pynemkaam hok ya ka Ambulance wei wow chakri ya waroh khlem em khian næ heh.
Da pynkut ya ka yalang da ki kyntien khublei na u Secretary Chnong, u Roming Lamare.
Hadien da em ka yalehbol da ki khynroo wa sah sor pyrchah wa kiwa sah chnong, ka Committee Chnong pyrchah ya ki Committee Tymmen Wasan Combine Rangbah Balang, ki Manbei pyrchah ya ki Khynroo wa kiwi kiwi.
