theme-sticky-logo-alt
theme-logo-alt
Advertisement ad1
Advertisement ad1

Deilang waka JSU chimbynta ki paidbah u pynsñiaw yei eh nei jhep ha Jowai

Advertisement ad1
Advertisement ad1
Advertisement ad1

Heiyatoh wa i eh wada mih lyngba i jhep ha Jowai iwa dadep neh da boon bnai kattu neidaw wym yoh thaw noh, ynne ka sngi neiliang ka Jaiñtia Student Union (JSU) Central Body da pynman ko i yalang paidbah ha Iawmusiang Jowai, wei ha kani ka yalang najrong ki dkhot ka seiñ kiwa naki Unit waphær waphær da chimbynta leh u klam pynap pynsñiaw da ki paidbah wa chong yaw wa kiwi. 

U President ka JSU Central Body, u Jersom Shylla hawa e yei klam ong u ini i kjut jia i toh neidaw wym em wanrah yei rukom noh jhep wa biang nadooh wa sdang, najrong wa da em i por wa noh taroi. Kamtæ ong u wa kani ka kjut jia ko neidaw wa thiah sngi ka sorkar wei lada ka sorkar ye ko u pynlut daki phaw klur yaka tamasa Cherry Blossom ileh wym ye won ko u pynlut hei wow chna yaka Sewage Treatment Management Plant ha Jowai.

Advertisement ad1

Hawa ban joor ya waroh kiwa mihkhmat ka Ri-loom Jaiñtia u em ki i bahkhlieh neibynta u yoh thaw noh jhep, pynkynmoo haroh u wa ka Iawmusiang wym toh du ya ki Jowai tangwa ya waroh ki bru ka Ri-loom Jaiñtia.

Ong haroh u wa lada ki chnong wa biang thaw pyrchah ma pyrchah ki wym yohlaad de u wanrah ya ka thaw nohjhep wa paka, iwa emkaam toh u e laad chwa wei lada yoo wym biang i rukom leh katkam wa da kular, toh u pyrchah won.

U General Secretary ka JSU Central Body u Treibor R Suchen da khut u i yakrehlang ki paidbah u em i ya sñiawthooh neibhah kamwa man katni ini i jhep da wanrah ko i ya sñiawphær thaaiñ, ya sñiawphær Elaka, ya sñiawphær niam, ya sñiawphær seiñbhalang, najrong wa ki bru wa pyrchah wym jooh bien ki u wan chaka miej u yaklam sñiawthooh neibynta i bha i miat ka ri Jaiñtia.

Da pynkynmoo u leh yaki paidbah wa i jhep Jowai wymtoh u Uranium yong ka jylla, wei wymtoh u tieñ kamwa tieñ Uranium, ong u wa sñiawtooh hi booh ko yaki paidbah hei artatien neidaw waka sorkar nadooh nyngkong ki sngi wym em chimkhia næ paitbniah bha ko yaka thaw wada yoh ko naka District Council.

Da pynrap haroh u wa boon bru wa pynman Politics ki ya kani ka kaam, tangwa lada kyruiñ cheiliang ka sorkar nadooh ki por Congress leh wym em hi wanrah ko ya katæ ka thaw noh jhep deiwa thooh rukom wow leh ya ka Scientific Waste Management.

Kamtæ kyntu u wow mylliñ ya waroh i jait sñiaw yaphær deiwa e laad 100 Acre ka thaw naka 3000 Sq Km yow noh i jhep, kamwa ka Jowai toh ka Headquarter yong ka West Jaiñtia Hills wa wan ki bru na kylleiñ, ong u wa emkaam u yatylli deiwa wan cha ka miej yaklam yow wanrah yei suk i khooid i jngiar ka Iawmusiang.

Najrong neitæ pynrap u leh wa lada ka NGT tba ko ya kawi pa kawi ka yaw wa em ha Ri-loom Jaiñtia booh ko hei maa, neibhah katkam ka aiñ da khana che ko wa waroh ki yaw toh u em ki thaw noh jhep yong ki hi hei dur Scientific Solid Management, iwa mut lada khang yaka Iawmusiang waroh ki yaw daw khang ko kamwa man i khang mooyong iwa daw ktah yaka ri waka jaitbru.

Neiliang kiwa chong dai leh da pynsñiaw ki i diaw wa neidaw wa lang ki jhep ha Iawmusiang wym em de ki bru wa ka-it u thied naki.

Kawi ka manbei hadien wa pynsñiaw yei diaw kam kawa chah ktah hei dai i thied, da iñdang ko leh yaki bru wa kynnoh ya u MLA wa katni deiwa ong ko ini toh i leh da uwa hachwa yong oo, neitæ iñdang haroh ko yei pynbaad ki bru wa i jhep ha Iawmusiang da noh da kiwa chongdai deiwa pynche wa lada i jhep mih i 5 truck, 2 truck toh du i Huggies i wym toh wa mih na kiwa chongdai.

Heijooh i por ong ko wa kiwi ki pli ki paidbah leh dei wym yohsa hap linoh jhep ki Iawmusiang neidaw wom yoh thaw. 

Chooh chooh da iñdang ko yaka Jowai Municipal deiwa ong kammon hi wa wan chna yung krehkaam ko ha Jowai khlem da pyrkhat deilang waka paikhna iwa mut khlem ka thaw noh jhep, neibhah wa waroh ki bru hawa chna yung ha sor da pyrkhat lang hi leh wa heiwon u chna paikhana.

Share this:
Previous

I rukom pynlai kari ha Shillong hawa lai tlep emburom ya u JD Rymbai

Next

Uiñ wei chah noh biang i jhep ha Jowai hi