U khynroo Juh Pa U Juh Nongtdu, u khon ka Gonga Nongtdu na ka chnong Nartiang, West Jaiñtia Hills District da man uwi wa rah naam ya ka jylla Meghalaya haka yakob “WAKO India National Kickboxing Championship 2024- Senior Boys & Girls” kawa dang dep pynman uni u bnai wa dep ha Goa, wei napyrdi ki 3 ngut wa yoh rah Takma Ksiar ya ka jylla Meghalaya da man u du oo samen napoh Riloom Jaiñtia katwa arngut won toh u Babit Kharsahnoh wa u Fedrick Khongsit kiwa na East Khasi Hills.
Kamtæ ynne ka 3 tarik kawa man ka sngi wa liwan chnong u, neiliang kiwa ha yung ha sem yong oo deilang uwi u waheh ka chnong Nartiang da li yang pdiang burom ki ya oo ha Ummulong kam ka dak i kmen i burom ya ka naam wa da rah u ya ka chong ka District waka jylla hi waroh kawi.
Hei yaklam wa uni u khynroo ong u wa hachwa ini da jooh lai lehke haroh u cha Thailand ha u snem 2021 wei da yoh u 3 tylli ki takma wa kynthup ar tylli ki Takma Ksiar ha ka Jeet Kune Do waka Karate, katwa ha ka yalehke Tang Soo Do won da yoh Takma Rupa u neitæ ini wa dep ha ka Meghalaya Games leh yoh Takma Ksiar u ha ka Wushu.
Hei lai luti yong oo kam uwa yalehke wa da yoh u lai chimbynta kylleiñ kylleiñ wei chem u wa ki khynnah na kiwi tawon ki jylla neidaw wa biang i yoh yarap poisa ki, biang i yoh sikai wei chynna wa ku ki hei yalehke kamjooh, katwa ha Meghalaya won neidaw wym yoh yarap poisa heithaw wow pynpliah yow lai yakhun cha baar, da lut por du hei lai thooh yarap poisa kylleiñ kylleiñ hadooh wa dooh noh ki ya ki takma wa toh sap u yoh neidaw wym ye de u pynkhreh bha.
Pyntip haroh u wa WAKO India National Kickboxing Championship kawa lai chim bynta u ini wadep man haroh ko kam ka Trail yong ka World Championship waka Asian Championship kamtæ oo katwa yoh u da ka Takma Ksiar da chah jied u wow lai chimbynta haka Asian Games ka wow man ha Cambodia, wei haka 18 tarik uni u bnai daw em ka Training ha Kerala.
Katwa kamtæ kyrpaad u yei yarap na ki paidbah yow kyrchaan ki ya oo khnang yow ye u wow rah yei burom ka chnong ka thaw, ka District waka jylla hi waroh kawi.
Wei kyntu u leh yaki para khynroo wow man kiwa kreh chitom yei sap wa da e u Blai hanla dooh duk leh oo hi wow yah luti.
Neiliang ka bei uni u khynnah khana ko 3 ngut ki khon ko kiwa ka’it ha kani ka jait yalehke, wei heipor wa pynsñiaw ki ha ka manda ong ko wym yoh poisa, waroh da yaam ki, ka leh manda poi yung yaam ko wei dei wym yohsa li paan ram ko neibynta yong ki.
Hadien wa chah jied won ar ngut ki khon ko wow lai cha Thailand katwa heh ware i lut da pynlai ko du ya u Juh Pa U Juh Nongtdu donhi deiwa lai paan yarap kylleiñ wa kynthup leh i yarap wa yoh ko na u MLA ka thaaiñ, u Sñiawbhalang Dhar. Wei kmen ko leh wa poi u khon ko ha ka thong.
Ha ka kynti wa lai u ini wadep leh toh lyngba i kyrchan i yarap lang kawi ka seiñ Self Help Group na ka chnong Nartiang, ka seiñ bhahlang FKJGP Nartiang wa kiwa ha yung ha sem.
Uwi na ki waheh ka chnong Nartiang u Hed Myria, uwa da emlang heini i pdiang burom, da pynsñiaw u i kmen yei mih kam uni u khynroo na ka chnong wei yooluti u leh wa kiwi tawon ki khon khynroo khyllood ka chnong u bood ki ya ka nongmuna wa bha yong oo.
Discussion about this post