Ka Jowai Diocese Catholic Youth Movement (JDCYM) da pynman ko ya ka 15th Annual Sports Meet ha Annunciation Church Parish Namdong ha ka 25 wa 26 tarik uni u bnai heiwa da wan chimbynta da ki 18 tylli ki Parish wa ka Shillong Unit.
Ha ka sngi sdang ya ka Sports, da sdang da ka ngooh ka dem Blai wa ka kñia ka khriam wa yahkhmat da u Fr. Lawrence R Paswet, Diocesan Youth Director (DYD) dei synranlang u Fr. Simeon Sungoh, Parish Priest ka Namdong Parish, u Fr. James Elizer Bareh, Spritual Youth Director, Namdong wei pynbood dei kyntien pdiang burom na u President, u Wellson Siangshai.
Ya kani ka Annual Sports Meet 2026 da wan wai pyrda da u Fourning Siangshai kam u kongsan, kamjooh leh da wai paidbah ya ka Basketball Ball Court wa pynchna ha kani ka Parish deilang i e sniawbha da ki Jersey cha waroh ki Parish wa Unit, ryngkat i sakhilang da ki Phadar, ki Sister, kiwa kitkaam ka JDCYM, kiwa chah khut sñiawbha chirup wa ki khynroo khyllood yong ki 18 tylli ki Parish wa Shillong Unit.
Ha kani ka Sports Meet da em boonjait ki yalehke nadooh ki Race, Football, Basketball, Arm Wrestling, Long Jump, High Jump wa Marathon.
Hei miet sdang ha ka sngi Thohdieñ da em ka Night Show Program dei wa pynman ya ka eSport ka BGMI, wei da em leh ka yaleh Arm Wrestling heiwa da wan sakhi da u Denis Dkhar kam u kongsan katwa u Philemon Shylla kam u symbood kongsan.
Ha ka Arm Wrestling yong ki chynrang da yoh nyngkong da u Lasarius Dkhar na Ummulong Parish, u Donjingkyrmen Synnah na Mowkyndeng Parish hei wa ar katwa u Kolestar Suting na Sahsniang Parish hei wa le.
Neiliang ki kynthai da yoh nyngkong da ka Monica Syntem na Barato Parish, ka Susalydiency Sten na Sahsniang Parish da yoh wa ar ko katwa ka Lasharai Dkhar na Mowkyndeng Parish hei wa le.
Hei step yong ka 26 tarik da pynman ya ka Marathon heiwa neiliang ki chynrang da yoh nyngkong da u Daniel Tyngkan na Mowkyndeng Parish, hei wa ar won da yoh da u Chrispin Dhar na Barato Parish wa u Shonghok Dkhar na Ladrymbai Parish hei wa le.
Neiliang ki kynthai da jop nyngkong da ka Baiahun Nongrum na Iongshiwiat Parish, hei wa ar ka Meris Sana na Ladrymbai Parish katwa ka Duhhakani Laban na Sahsniang Parish hei wa le.
Ha ka yakhun Final yong ka Football, ka Barato Parish da jop ko pyrchah ya ka Amlarem Parish, katwa ha ka Basketball yong ki chynrang da jop da ka Shillong Unit pyrchah ya ka Cathedral Parish Jowai wei hei yong ki kynthai da jop da ka Shillong Unit pyrchah ya ka Ummulong Parish.
Yei naam Best Athlete neiliang ki chynrang da yoh da u Ïarmi O Lamin na Barato Parish katwa neiliang ki kynthai da yoh da ka Elizabeth Dkhar na Ladrymbai Parish.
Na waroh ki Parish waphær waphær kiwa chimbynta, ka Parish Barato da rah ko yei naam Champion ha kani ka Sports Meet 2026, katwa ka Parish Mowkyndeng hei kyrdan wa ar, ka Parish Namdong hei kyrdan wa le wei yei naam Best Discipline da yoh da ka Iongshiwiat Parish.
Ya kani ka Sports Meet da wan wow pynkut wei u pynhaap ya ka lama ka seiñ da u Rishot Thubru, President West Jaintia Hills District Youth Congress kam u kongsan katwa u Joe Dickinson Siangshai, Secretary West Jaintia Hills District Youth Congress kam u symbood kongsan deilang i kyntien sneiñ kyntien e mynsien cha ki khon khynroo khyllood u lehbha ki ha ki liang waroh.
Discussion about this post