Ynne ka sngi ka STIEH kawa man ka seiñ ki kynthai wa ki manbei da e dorkhat ko ha u DC ka East Jaiñtia Hills wa cha ka Meghalaya State Pollution Control Board (MSPCB) wow pyrchah yei pynman ya ka Public Hearing namo ka pynsñiaw paidbah heiyatoh wa i sdang tih moochuni ka karkhana pynmih khyndaw-bilat (Star Cement) ha Brichyrnot, East Jaiñtia Hills ha ka 21 tarik uni u bnai.
Ha ka dorkhat, ka STIEH da ong ko wa i daw wa pyrchah wow pynman ya kani ka Public Hearing toh wa daw ktah ini i kaam tih moochuni ya ka rymaw wa ki soodong sookun iwa jngai du kamwa 1.46 km na ka Narpuh Wildlife Sanctuary, 0.25 Km donhi na ka Eco Sensitive Zone wei du kamwa 1.38 Km na ka wah Lukha iwa daw ktah ya ka Rymaw wa ka mynried mankawi.
Da ong ko wa ka Environment Impact Assessment Notification, 2006 Under stage III yong ka sorkar pyrdi da chah ko wow pynman ya ki Public Hearing neibynta u pynsñiaw ki paidbah kiwa ye u chah ktah na ini i kaam wa i rukom im yong ki wei wa kani ka rai ka sorkar pyrdi da ong ko wa ya ki Public Hearing toh u pynman du ha i thaw wa thmu wow pynman ya i kreh namo u sdang ya i kreh wa da thmu.
Kamtæ i pynman ya kani ka pynsñiaw paidbah ha pchem ka yung krehkaam u DC ka East Jaiñtia Hills man i iwa pyrchah ya kani ka rai namo ka hukum ka sorkar pyrdi wei da chah wow wan chimbynta du hapoh kamwa 100 ngut donhi ki bru.
Da pynrap leh wa ki paibbah na ki chnong wa yajan wa kani ka thaw wa thmu wow tih ya u moochuni da pyrchah ki yeini i thmu wow tih ya uni u mar (moochuni) heiwa da sakhi wa ki pynsñiaw paidbah wa ar sien wa pynman chwa ini da man ki kiwa da sepai.
Ka STIEH da maham ko leh wa ini i thmu wow leh embor ka sorkar daw pynbor ko ya ki wow ujor katkam ka kyndon 133 yong ka aiñ CrPC 133 kawa klam hajrong i thmu ka sorkar wow sdang ya i tih ya ki mar pohkhyndaw pyrchah yei sñiaw ki paidbah.
Chooh chooh ka seiñ da kdaw ko ya ka Article 21 yong ka riti synchaar ka ri (Indian Constitution) kawa klam hajrong i hok wow im weiwa ka seiñ ye ko leh wow lai ujor cha ki yung kasari heiyatoh wa ini deiwa kyntu leh ya ki bor sorkar wow pynsangeh namo wow pyndam noh ya kani ka rai wow pynman ya kani ka pynsñiaw paidbah.
Da pynrap ko leh deiwa ong wa ini i leh toh man i neibynta wow yada ya ka rymaw khnang wa ka mynried u myntoi ko na ka.
