Ki dkhot ka EC ka JHADC ynne ka sngi da lai yachem ki ya u Commissioner & Secretary ka District Council Affairs u Aldos Mawlong, deiwa emlang leh ki Joint Secretary ka Mining & Geology Department, Forest Department, Transport Department yow yaklam chaphang ka bhah poisa yong ka Council kawa dang sah waka sorkar jylla kawa wan na ki mar pohkhyndaw.
Ini i yachem da man ko kawa lai bait heiwa da yoh yei kular wow pynlait noh yaka poisa wa man i bhah ka JHADC hapoh uni u snem.
Ini i lai yachem leh man ko kam chibynta ka hukum ka Meghalaya High Court hadien wa ki wakreh ka JHADC da yaleh mukotduma ki neidaw wym yoh tulop ki la kamwa 10 bnai kamjooh leh ki MDC ym em yoh tulop ki.
Kani ka bhah ka JHADC toh kawa da sah nadooh u Wisu (March) 2017 iwa da wanrah yei chiboon i eh i khoo yaka Council khamtam hei wow su yaka tulop ki wakreh yong ka.
Ki dkhot ka EC wa da emlang ynne ka sngi toh nadooh u CEM u Thombor Shiwat ki EM wa kynthup ya u Lasky Rymbai, u Phasmon Dkhar, u Brightstar Chyrmang, u Winning G Sungoh deilang wa ki sahep ka JHADC.
Kamtæ da yooluti ki wa deiwa pynlait ya kani ka poisa daw yarap ko yaka Council wow su yaka tulop kawa sah.
