Deiwa phah chithi cha u Conrad wa u Lahkmen pynman yakih kiwa sikai SSA

Kiwa sikai SSA hapoh ka lama Laskeiñ Block Meghalaya SSA School Association (MSSASA) Unit, ynne ka sngi da pynman ki da ka Letter Campaign namo wow phah ya ki chithi na Jowai Post Office cha u Montri Rangbah ka jylla, u Conrad Sangma wa cha u Montri ka chnat Puræ Puthi, u Lahkmen Rymbui hajrong i wym yoh tulop de ki kattu la kamwa san bnai.

U Vice President ka seiñ, u Teibor Papang, da ong u wa kani ka ‘Letter Campaign’ wow phah chithi cha ki Montri ka sorkar toh wow pynsñiaw wa kiwa sikai SSA chem chitom ki man-ka-sngi hadien wym yoh tulop iwa da ktah ya ki hei wow su ya ka bai skur khon, ka bai baam ha yung wa kiwi kiwi.

Da kylli u leh wa lada u Montri ka chnat puræ puthi dooh tulop u hadooh 5 bnai tip kammon wow man khamtam katni wa da poi ka samoi lehkmen Christmas.

Chooh chooh u Teibor da pynkynmoo u wa ha kini ki bnai wa dadep kam kiwa sikai SSA dadep pynman ki ya ka Rally ha Shillong wei neiliang ka sorkar da pynlait ko ya ka tulop ar bnai wei kani ka poisa da lut ko du hei wow su ram donhi deiwa pynrap leh wa lada kamni kopsar kiwa sikai emkaam wow pynman yakhih ki man-i-por wow yoh tulop wei lada kamtæ yi wow hikai won ya ki khynnah ha skur wei ka sorkar toh u pynche wa lada u yakhih yow poisa namo u sikai yow yoh poisa.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kiwa sikai ynne da dawa noh ki ya u Montri wow hiar chuki noh u khnang wow ksoh noh ya ini i kaam da kiwi kiwa rap chkæh.

Ka Marjoosynta Lyngdoh kawa man leh ka dkhot ka seiñ da ong ko wa i wan yong ki ynne toh dei diaw mynsien wei sñiawsih kthang kam kiwa sikai SSA ka jylla waroh kawi kiwa da em hadooh 12,541 ngut.

Da ong ko wa ha kam kini ki samoi lehkmen Christmas da yooluti ki wow yoh u thied sula wa u Cake Christmas wa New Year ya ki khon tangwa ini da pynsñiawsih pathan i ya ki kam kiwa sikai SSA neibhah wym yoh ki wow pynhun yeiwa kwah ki khon.

Chooh chooh da kyrpaad ko ya u Montri Rangbah wa u Montri ka chnat puræ puthi ka jylla wow kyruiñ cha ki neibhah katwa dang mih ki sngi kam kiwa sikai SSA dang chem chitom ki neibynta wow hikai ya ki khynnah kiwa man ka mynried wa tyrchaaiñ ka ri.