Deilang wa waroh kawi ka ri, ha East Jaiñtia Hills District leh da lehkmen ya ka 77th Republic Day ha Holy Family Parish Ground, Khliehriat deiwa wan u Montri sorkar, u Lahkmen Rymbui wow pynhær ya ka lama le rong ka ri wei da chim u leh ya ka Rashtriya Salute ki 11 tylli ki dhab wa yaleh Parade wa kynthup ya ka District Police, ki NCC Units wa ki khynnah na kiwa boon ki skur.
Da em leh i pynyoo rong da ki 10 tylli ki chnat sorkar ya ki Scheme wa pynkrehkaam wei da em leh i chaad i rwai na ki khynnah skur ka District.
Ha ka March Past da yoh nyngkong ka Jawahar Navodaya Vidyalaya (JNV), Rymbai NCC Unit, hei wa ar da yoh ka Jaintia Eastern College (JEC) NCC Unit katwa hei wa le da yoh ka Jawahar Navodaya Vidyalaya (JNV), Rymbai-Girls.
Heiyatoh wa ki chaad ki rwai, da yoh nyngkong ka K.B. Memorial Secondary School, Wapung, ka Jawahar Navodaya Vidyalaya, Rymbai da yoh wa ar ko katwa ka Ambrose Memorial Secondary School, Khliehriat da yoh wa le ko.
Da pynkup burom leh ya ka Runita Phawa da ka Best Cluster Coordinator Award katwa ka Byrwai Village Employment Council (VEC) da yoh ko ya ka khusnaam Best Performing Village Employment Council (VEC) neibynta u Financial Year 2024–2025.
Da pynkup burom leh ya ka San Shnong Cluster Level Federation hapoh ka BMMU, Wapung Block kawa da yoh ya ka National Level Award ha New Delhi haka 14 tarik u August, 2025.
Na ki chnat sorkar kiwa da wan pynyoo rong da yoh nyngkong ka District Project Manager (DPM), District Project Management Unit (DPMU), MBMA, Khliehriat, hei wa ar da yoh ka District Horticulture & District Agriculture Offices katwa hei wa le da yoh ka District Commerce & Industries Centre (DCIC), Khliehriat.
Ha kani ka sngi da lai e sñiawbha leh cha kiwa em ha ki Shelter Homes hadien wa kut ka lehkmen.
Discussion about this post