Ha ka 15 tarik uni u bnai, ka Jaiñtia National Council – Western Zone hapoh i yahkhmat u President yong ka, u Hamehi Bamon da lai mih ki cha yung krehkaam u CEM ka Jaiñtia Hills Autonomous District Council heiyatoh wow paan pynche neibynta kiwa boon ki mat khamtam ki Bank wym tipmit ki ya ki kot ki sla yong ki thaw ki bhaw kiwa chong chnong namo ki Land Holding Certificate wa da e da ka JHADC.
Hei yachem wa u CEM ka JHADC, u Thombor Shiwat, neiliang u Hamehi da paan pynche heiyatoh weini khamtam wa chem chitom ki bru hawa lai paan ram na ki Bank neibhah ym tipmit ki ya ki kot ki sla wa da e da ka Council.
Ka seiñ da kyntu ko na u CEM wow chimkhia yeini i kaam wow yaklam næ wow wanrah ya kani ka bynta ha ka Executive Committee ka Council namo wow yaklam wa ki Bank khnang wow suk ki paidbah.
Chooh chooh ka seiñ da ong ko leh nei wym tipmit ki Bank ya ki kot ki sla ka Council da pynbor ya ki tre thaw wow lai pyntipmit næ Register noh yei thaw yong ki ha ki yung krehkaam u Deputy Commissioner deiwa su leh ya ka dan kawa heh bha iwa ktah ya kiwa boon.
Hajrong ini neiliang u Thombor Shiwat da kular u wow chimkhia wut-wut deiwa khut yaklam noh ya ki Bank.
Discussion about this post