U K.L. Pariat uwa man kam u President ka Khooid Yaka Wah Myntdu da pynsñiaw u yei sñiaw diaw wa da poi ka umkor ka cha kiwa chong chnong ka Jowai da kawa jngut, wa jnah wei kawa ktieh wei i daw wa kongsan tam toh na iwa e laad ka yung krehkaam u EE PWD (NH) Jowai Central Division, ya ka M/s Dhar Construction Company kawa pynkreh ya u sarok Jowai Bypass wow noh khyndaw ko nadooh na Liar Pam Kam chadooh cha rood ka Mynkrem waka Wah Myntdu kawa pynbiang um ya ki yung ka chnong Jowai lyngba ka PHE (E) Jowai.
Da ong u leh wa ini i yoh um ki yung da kawa jngut wa ktieh da sdang i nadooh u Naiynru u snem 2021 hawa sdang ka chnat krehkaam ka sorkar ka EE PWD (NH) Jowai Central Division, u pynheh ya u sarok ha Treiongriang wei da nang joor chooh chooh i ktieh ka um nadooh uni u Naisan, 2024. Kopsar daw pteiñ ini i ktieh ka um ha kani ka lyiur waroh chi snem.
Ya ini i leh khiar nadooh nachwa hadooh katni da boon bha i ujor dei thoh wei da chem ki Magistrate ya i noh khyndaw ha ka Wah Myntdu wei dadep e leh ka ujor cha u DC ka West Jaiñtia Hills District yow pynchitom ya kiwa leh pyrchah katkam ka hukum ka NGT.
Katwa da joor wara du i ap wa i yaklam khlem da pynsangeh heiyatoh wa itai i chem wa itai i leh khiar, tæ nang joor chooh chooh i ktieh ka wah Myntdu sa na i noh khyndaw na utai u sarok thymme hadooh wym yoo de ka PHE (E) u pynkhooid ya itai i ktieh yow yoh um da kawa jngiar wa khooid ka wym yoo yoh de.
Lada ka sorkar jylla ym smat ko u leh lura yow pyndam ya ini i pynktieh ya ka Wah Myntdu, ka chnong Jowai daw raw um ko wei ki warep kba ha Myntdu Pynthorneiñ wa Pynthorwah daw dooh khoo ki uni u snem na i tooid ka um ktieh cha ki hali yong ki.
Discussion about this post