U MDC ka Liang Pyrchah ka JHADC na ka Party Congress, u Madonbai Rymbai hawa klam cha kiwa thoh khubor da pynsñiaw u i diaw hajrong i man i long ka JHADC deiwa ong wa katni kani ka Council da maad ko yei eh wa khroo nei kyrdooh poisa wei kawa maa tam yoo lakam wow haap u oor næ kut syndon ko.
Kini kiyi kiyi waroh ong u toh neidaw wa ka Executive Committee ym em u chimkhia ko wow thooh ki laad ki luti kammon u pynku ya ka yarong poisa ka Council, heiwa wot ya ki thaw pynmih poisa wa da em chwa leh ym yoo tipsap i rukom pynlai wei ym yoo hi leh yei yoh nong ka Council.
Ong u heiyatoh wa i em ki Cement Plant hapoh East Jaiñtia Hills kiwa pynlai da ki baar jylla leh ym em yoo wa ka Council yoh dan ko wot hawa ka aiñ lyngba ka Regulation 1954 da batai che ko wa ya ki baar jylla lada dai kwai dong donhi ki leh hap su dan bait ki cha ka District Council tangwa kat da ka Cement Plant kawa heh wei haap hapoh u pood ka JHADC leh ym em yoo wow pynmyntoi ko ya ka Council.
Neitæ ong u wot i em ki yaaw ki haat kiwa pynman yaaw man-ka-sngi, kiwa pynman chisien chi tayaaw leh ym yoo yei yoh nong ka Council lada toh na ki yaaw wa em ha East Jaiñtia wa West Jaiñtia.
“Kattu la chi snem wa man biang O kam u MDC ym em yoo soh yoo sla iyi iyi næ i yoh ya ka dan, kammon hi dam u maad yeini i eh, wa hei sakhiat i yoh dan toh u nangku nangku, hantæ da nangku nangku pathan da i kyrdooh poisa, wei ini booh ko hei maa yaka mynstep mankawi ka Council,” ong u MB Rymbai.
Hajrong kat ini i eh, u MB Rymbai kyntu u ya ka EC wow thooh laad naka Central Scheme, neibhah wa oo leh heipor wa man CEM u ha u 2018 da wanrah u palat Rs. 18 klur ka poisa naka Central Scheme tangwa rem noh u ha u 2019 kamtæ ym yohlaad de u wow lehbha yeiwa mut wa mang u.
Da e buit u ya ka EC wow chna ko ki laad pynmih poisa lyngba ka Myrkeiñ Protected Forest kawa em hajan chnong Jaraiñ ka luti wow lai cha Dawki, wa ha kani ka thaw toh u wanrah ki Project pynmih poisa ya ka Council iwa yatoh wa ki kaam uiñke suwari kamwa kani ka thaaiñ leh toh kawa khriñ bha ya kiwa uiñke suwari.
Ka Council lyngba ka Forest Department ong u em ko ya ka Beat Office, ka Protected Forest Nursery, ka Tree Plantation, ha kini leh ym em yoo u iyi iyi i myntoi, najrong wa ya ki Beat Office da e wai cha ki bru samen.
Hajrong i e wai ya ki Beat Office ong u wa hei sakhiat katkam ka Regulation 1959 ya ki Beat Office ym ye u e wai neibhah lada booh da ki bru wym em i tip i chemphang (Untrained) ha kani ka kaam kammon hi u ye u pynlai ki yei kaam.
Discussion about this post