Dooh bordiñ ka Dong Wailong la ar tayaaw kawa man leh ka thaw wa em ka CHC

Ynne ka sngi, ka Jaiñtia National Council (JNC) da lai yachem ko wa u Executive Engineer ka MePDCL Khliehriat Division heiyatoh wa i dooh bordiñ ka Dong Wailong ka Chnong Sutnga la kamwa 2 tayaaw tam kattu.

Ka seiñ hadien wa yoh ko yei ujor na kiwa boon kiwa chong chnong, deiwa sñiawkhia da lai yachem ko wa u EE heiwa da khana u wa i daw wa dooh bordiñ toh nei sih u Transformer uwa em ha katai ka dong, wei da ong u leh wa i joor ware u slap waka la’ær ha kini ki sngi da chah ktah boon uni u Transformer.

Neiliang ka seiñ hapoh i yahkhmat u Information Secretary JNC-CEC, u Mebanteilang Sukhlaiñ wa u President ka Khliehriat Circle, u Shanborlang Bamon hawa paan yei pynche wa lada dang ye yow pynchna, neiliang u EE da ong u wa emkaam wow kylliang noh da uwi, wei da khana u leh wa neiliang ka yung krehkaam yong oo dadep leh ki yeiwa emkaam itæ toh wow phah wut-wut ka Report cha ki bor wa haneiñ wow e noh da u thymme khnang wow leh yeiwa emkaam tangwa hadooh katni ym pu yoh yei jubab.

Chooh chooh u EE da khana u neiliang yong oo da yaleh chitom u wow phah leh da i thoh cha u Chief Executive Engineer wow pynbor ya oo wow pynyoh noh ki da u Transformer wa thymme tangwa hadooh kattæ dang sahteiñ ini ymtip neiyi i daw.

Neiliang ka seiñ da booh ko i kyntu wa joor yaka sorkar khamtam leh ya ki bor wa toh u pait yeini wow sñiawbha ki u chimkhia yeini wei wow leh smat ki leh yeiwa emkaam, ymtoh wow e daw hi-eh neibhah da sñiaw yei kyntien wa ong, “Hei liyur joor u slap hei tlang won duna ka um” tangwa ka bai bordiñ won ym jooh em maap.

Related posts

Ka Anniversary ha uni u snem kyrsu ko yei mynsien wei pynkynmoo ko yei kaamram wa toh u leh: President Unitarian Union

September 18, 2025

Pynkrehkaam hok katkam ki hukum, dawa ki Muster Roll na ka sorkar | Da kyntu ya ki dkhot wow kreh minot yei kaam

September 18, 2025

Kam wow pynkynmoo wa ka Dong Wailong ka chnong Sutnga toh ka dong kawa em ka thaw sumaar kawa heh katæ toh ka CHC kawa e yei chakri ym du yaka chnong Sutnga tangwa ya ki phaw phaw tylli ki chnong kiwa em cha katai ka thaaiñ. Tæ lada kani ka thaw sumaar chong ko hei doom da ki tayaaw ki bnai tæ katwon u chah ktah i chakri ya kiwa kjut wa chitom iwa man i kaam yap kaam im.

Neiliang ka seiñ ym sñiaw ye ko wow ieh yeini wei daw booddien ko leh neibhah ha kini ki sngi i dooh bordiñ wanrah ko chiboon i eh nadooh i thut hei kaam yung kaam sem hadooh i wym chngaaiñ leh hei lai i wan.