Ynne i sngi da em i jia wa sñiawsih ha Lumpyrdi Ummulong, West Jaiñtia Hills heiwa heipor kamwa 2:00 waje i diñ da baam lut i ya iwi i yung iwa em ha i bynta wa tip kam i Hap Arplieñ yong ka chnong heiwa da dooh leh ya ar tylli ki mynsien wa kordor yong ki ar ngut ki khynnah kiwa man chi payu.
Katkam ka yutip wa da yoh da ong wa ini i yung toh i yong ka Mansooki Challam (23 snem i rta) wei ini da jia i heipor wa lai sait-that ko ha i thaw wa tip kam i Sngikur wa em hajan ka thaw sumaar St. Aloysius Hospital, Ummulong wei da ieh ko ya ki khon yong ka ha yung.
Da ong wa u kurim ka Mansooki, u Junom Suna (25 snem) da lai e that u ya ka cha ka ha ini i thaw deiwa pynchong ya ki ar ngut ki khon ha yung deiwa khang na lait wei du hadien chibet chipor da sdang i diñ wow kop ha ini i yung wa sah ki.
Ya ki ar ngut ki khon yong ki kini ki chi kurim kiwa da dooh yei mynsien yong ki kynthup ki ya u Ambrose Challam (4 snem) wa u Pynshai Challam (2 snem).
Kat wow poi ka kari tympleh diñ, yei yung da dep wow baam lut chwa i diñ. Nyngkong da yoo da ki bru wa em chajan yei mih tdem napoh yung kiwa da pyrchang wow tymleh yei diñ.
Hajrong ini i jia neiliang ki pulit dang pynman ki yei takit.
