Dooh nong ka sorkar wym kheiñ dan ya ki mar wa psiah cha ki karkhana: AMTT

Ka seiñ Association of Meghalaya Traders & Transporters (AMTT) da ong ko wa sñiawsih wow yieñ u pait wa ki karkhana pynmih khyndaw-bilat ha East Jaiñtia Hills kiwa da pynemkaam du ki mar wa da tih ha kiwa boon ki bynta ka District, ym em wa pait yei lai i wan ki kari wa kit mar deiwa booh da ki Revenue Checkpoint lane ki Check Gate chwa wow psiah cha ki Cement Factory da pynyoh myntoi bha ya kini ki karkhana heiwa nadooh u mooyong wa u moochuni wa wanrah da ki tre chnong ym em wa kheiñ dan ki da kiwon kiwon ki bru sorkar.

Ka seiñ da ong ko wa kam ka jylla yong i kawa dooh wa duna poisa, ini i wym ye u khieñ dan da pyndooh poisa ko wow yoh u chna sarok, chna skur wa ki thaw sumaar.

Da ong wa emkaam wow pynkrehkaam heitæ i rukom wow myntoilang waroh wei ka sorkar jylla ym toh u chah chilliang ko ya ki karkhana pynmih khyndaw-bilat wa em ha East Jaiñtia Hills, ya ka dan Royalty toh u kheiñ na waroh ki mar pohkhyndaw wa pynpoi cha kini ki karkhana deiwa booh ya ki Revenue Checkpost.

Ka seiñ da antaad ko wa kamwa 800 tylli ki Truck wa kit moochuni psiah ki cha kini ki karkhana wei da kit ki kamwa le chah ya iwa chah u kit. Wei deiwa kheiñ 30MT chi Truck chi sngi hei 365 sngi chi snem dapoi 8,760,000 MT chi snem. Kamtæ da ong wa ka sorkar jylla waka sorkar pyrdi da dooh ki chiboon bha ka dan na u moochuni wa da pynpoi cha kini ki karkhana ha East Jaiñtia Hills District.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chooh chooh da ong wa lyngba kani ka poisa daw ye u chna ym duna 100 Km u sarok man-u-snem ha East Jaiñtia Hills District. Wei ka sorkar da leh thlah ko yeini heithaw wow kheiñ dan yow ye u pynduna ya kiwi ki dan kam ki dan i phñiang kari wa kiwi kiwi.

Heijooh i por leh ka sorkar hap ko wow pyrkhat neibynta ki tre chnong, tre jylla wa em kari yow yada yei khih i khan yong ki neibhah hawa e yarap lyngba ki Subsidy ya ki karkhana, hap leh wow pyrkhat ya kiwa kreh deiwa kit mar wei wow e laad chwa ya ki tre chnong wow kit ya kiwon kiwon ki mar.

Kamtæ ka Association of Meghalaya Traders & Transporters (AMTT) da e ko leh yei kyrchaan wa pura yei yakhih ka Jaintia Hills Truck Owners Association (JHTOA.)