Ka waje kti wa da chna kyrpang da ka Hublot ya u (L) Diego Maradona da yoh biang ka na u Wazid Hussain uwa na Sibsagar, Assam hadien wa chah tooh ko na Dubai.
Kani ka waje toh kawa syad dor bha wei kawa jooh pynemkaam leh da u Maradona wei da thooh ya ka da ki pulit ka Dubai hadien wa chah tooh ko heiwa da suba wei da booddien ya u Wazid cha Assam uwa da yut hadien wa suba tooh u ya kani ka waje.
Ya u Wazid da kem ynne i step heipor 4:00 waje na yung wa sah u ha Sibsagar heiwa da chem ya kani ka waje na oo wa tooh u.
U Wazid toh uwa kreh kam u Security Guard ha kawi ka Company wa em ha Dubai kiwa pait wei syndong ya ki tiar ki tar u Maradona.
U Wazid du hadien kattu katni sngi wa kreh u, da paan u wow lai liwan noh neidaw wa chitom u pa u heiwa da poi biang u cha India ha ka Delhi ha ka 15-08-21.
