Kiwa sikai RMSA (Rashtriya Madhyamik Shiksha Abhiyan) yong ka Jaintia Hills (East wa West) da pynsñiaw ki yei eh wa khroo neidaw waka sorkar ym em de su tulop ko ya ki la 6 bnai nadooh u Naiynru (June) hadooh ka Khonchonglad (Nov) uni u snem.
Kiwa sikai RMSA da ong ki wa ini i dooh tulop da wanrah ko yei eh wa khroo hadooh wym ye de u pyndap pynbiang hayung hasem nadooh i baam, i dawai, ki sula tlang ya ki khon yong ki wei da hap wow paan daka ram yow pyndap pynbiang ya kiwa hayung hasem hadooh wym ye de wow su tang ka bai kari leh yow poi cha ki skur neibhah boon na kiwa sikai RMSA toh kiwa sikai cha ki thaw wa jngai cha palatsor wa jngai kamwa 40 hadooh 60 Km nei thaw sah yong ki.
Da ong leh wa lada sah wai hajan ki thaw wa sikai ki leh ym yoh de u su tang ka bai wai leh, neitæ i daw neiliang yong kiwa sikai RMSA da kyrpaad ki ya ka sorkar wow sniawbha ki u pynlait ya ka tulop yong ki chwa Christmas khnang wow ye u pyndep ya i kaamram yong ki khamtam hawa ki e ki yei nang i stat ki khynnah.
Ka RMSA leh man ko kawa kyrchaan poisa da ka sorkar pyrdi namo ka Centrally Sponsored Scheme neibynta ki skur Secondary heiwa neiliang ka sorkar da ong ko wa ka sorkar pyrdi ym pu em pynlait poisa ko kawa 90% ka tulop katwa ka 10% won toh iwa e daka sorkar jylla.
Chooh chooh da ong wa kamwa jooh yoh tulop kiwa sikai SSA, kiwa sikai RMSA leh yoh lang ki heiwa ini wadep kiwa sikai SSA da yoh ki ar bnai ka tulop katwa kiwa sikai RMSA won ym em yoh ki.
