Ka Voice of the People Party (VPP) da ong ko wa ka hukum ka sorkar wow khang ya kiwa sikai skur wa College wa ki skurbah wow ksoh kaam hapoh kiwon kiwon ki seiñ saiñhima wa ki kaam synchaar chnong toh iwa pynrandien biang ya ka imlang sahlang cheiwa rim neiwa jooh man katni.
Neiliang u heh ka VPP uwa jooh man leh u MLA warim, u Ardent Miller Basaiawmoit da yachem u ya u Montri Rangbah ka jylla, u Conrad Sangma wow pynsñiaw yei pyrchah hajrong ini i rai ka sorkar wow khang ya ki khroo pyrkhat ka jylla wow embynta ha kiwon kiwon ki seiñ saiñpyrthai wa kiwi ki seiñ heiwa ka VPP da dawa ko wow pyndam noh ya kani ka rai neibhah wa man ko pyrchah ya ka riti synchaar ka ri.
Ha ka dorkhat wa da ekti ha u Conrad, u Basaiawmoit da kdaw u wa ha u Naisan 2019 ka UGC da rai ko wa kiwa sikai ha ki skurbah wa ki College kiwa da chah jied kam ki MP wa MLA ye ki wow pteiñ yei kreh yong ki (wow hikai) wei wow man ki leh kam ki MP wa MLA heijooh i por khlem chim chuti.
Ka VPP da kdaw ko leh wa katkam ka rai ka Division Bench ka Gauhati High Court ha ka mukotduma WA. No. 14 of 2001, Dated 07-12-2005 da rai wa kiwa kreh ha ki thaw hikai kiwa kyrchaan ka sorkar ymye wow kynthup ya ki kam kiwa kreh sorkar wa pura.
“Ka sorkar Meghalaya da jooh rah teiñ ko ha ki yung kasari wa kiwa kreh ha ki thaw wa kyrchaan ka sorkar ym em man ki kam kiwa kreh sorkar tangwa man ki kam kiwa kreh wa ki bru samen (Private Management),” da ong uni u heh ka VPP.
Chooh chooh da ong u wa neidaw wa kiwa kreh ha ki thaw hikai wa kyrchaan da ka sorkar ymtoh man ki kam kiwa kreh sorkar kamtæ ymye wow khang ya ki wow embynta ki ha ki kaam Election kawa man pyrchah ya i hok manbru namo ka Fundamental Rights hapoh ka riti synchaar ka ri (Indian Constitution).
