Shillong: Ka sorkar jylla da pdiang ko wa em i duna hawa thap pyrtuid ha ka MHIS Phase IV neidaw wa duna ki kor (Machine) kawa da wanrah yei khnium na ki paidbah ha kiwa boon ki thaw.
Hawa yaklam wa u montri ka sorkar jylla uwa pait yaka chait ka khiah, u Alexander Laloo Hek da ong u wa da yoh ya kiwa boon ki ood wa ki ujor na ki paidbah heiyatoh wa i rukom pynpsiah pyrtuid wow yoh yarap na ka Scheme MHIS ka bynta wa soo.
“Nga da yoh O yaka ujor na kiwa boon ki bru hawa pynpsiah pyrtuid ki haka MHIS Phase IV. I daw wa kongsan wa pyntkoh ya ini i pynpsiah pyrtuid toh wa ki kor duna palat ki wei sa kawi toh wa ye u pynpsiah pyrtuid du 30-40 ngut chi sngi, tangwa neiliang ka chnat u pyrchang ko wow wanrah chooh chooh ki kor khnang wow pynsmat ya ka kaam,” da pyntip u.
U montri da pyntip u leh wa em hadooh 30 lak tam ki bru wa wan thap pyrtuid katwa ki kor won em ki du 300 tylli iwa da pynman ya ka chnat wym ye ko wow pynbiang lut hawa thap pyrtuid wei ini i duna yong ki kor katni da pynman ko yaka chnat wow sangeh wow lai cha ki chnong wow thap pyrtuid. “Daw pteiñ cha kiwi ki chnong ki wym pu ym dep wow thap pyrtuid wei ym ieh leh tang uwi,” da pynrap u.
Da pyntip u leh wa ym booh por wow pyndep yei thap pyrtuid neidaw wa em kam kini ki eh wei daw pyndep smat hi yow yoh myntoi ki paidbah.
“Lada em kiwa chong chnong kiwa emkaam smat wow thap pyrtuid ye ki u leh ha yung krehkaam ka MHIS wa em ha Laitumkhrah ha iwon iwon i por.” Da ong u Hek.
Discussion about this post