theme-sticky-logo-alt
theme-logo-alt
Advertisement ad1

Yachem ka seiñ SBYWA ya u Kyrmen Shylla neibynta ki soo tylli ki mat wa emkaam

Advertisement ad1

Khliehriat: Ka seiñ Southern Border Youth Welfare Association (SBYWA) da yachem ko ya u MLA ka Khliehriat uwa man leh u montri ka sorkar jylla, u Kyrmen Shylla ha kamra krehkaam yong oo heiwa da booh ko hadooh soo tylli ki mat wa emkaam neibynta ka thaaiñ.

Kawa nyngkong ka seiñ da pynkynmoo wei wa da dawa ko na u Kyrmen wow yaklam wa u Montri ka chnat i chait i khiah neibynta ki paidbah ya ka Bataw PHC kawa da neh boon boon snem khlem wai ya ka wei hajrong kani ka PHC u MLA da khana u hakhmat kiwa yahkhmat ka seiñ wa hapoh uni u snem ka sorkar u wai noh ko ya kani PHC heiwa i pynmiat pynbha da dep lut ka sorkar.

Kawa ar, ka seiñ dawa ko wow chna pynmiat ya u sarok wa tip kam u RBBJ Road uwa da sih bha katni heiwa da booh u hei eh i khoo ya ki paidbah ha i lai i wan yeiwa u MLA da kular u wow chimkhia wow leh yeiwa emkaam, tæ da pyntip u leh wa dadep tyrwa (Proposal) wow pynmiat smat ya uni u sarok. Chooh chooh u MLA da pyntip u leh wa neiliang ka sorkar da thmu ko wow pynlait liang ya uni u sarok chadooh Sonapur khang wow suk ki paidbah.

Kawa le ka seiñ da dawa ko na u MLA wow e Ambulance ya ka seiñ neibynta wow e chakri ya ki 10 tylli ki chnong yong ka thaaiñ wa kynthup nadooh ka chnong Shilliang Umshong, Iapmala, Lumskhen, Soo Suchen Pyllun, Lumputhoi, Rngad, Wahsarang.

Ka mat wa soo ka seiñ da dawa ko na u MLA wow yaklam wa u Montri ka chnat i chait i khiah wow pynku kyrdan ya ka Sub-Center kawa em ha Iapmala cha ka PHC heiwa ka seiñ da sñiaw emkaam ko wow em da ka PHC wa thymme khnang wow suk ki paidbah ha ka liang i thooh dawai dachin neibhah katni ya kini ki chnong da haap pait da ka Rymbai PHC kawa booh hei eh ya ki paidbah.

Chooh chooh ka seiñ da ong ko leh wa kani thaaiñ da toh hok u yoh ko jar ka PHC khnang wow suk ki paidbah ha waroh ki liang.

Neiliang u Kyrmen da kular u wow pait ya kini ki kaam deiwa yaklam wa ka sorkar neibynta i emkaam ki paidbah.

Heijooh i por u montri da e yaroh u ya ka seiñ SBYWA kawa da chim ko ya kini ki mat dawa wa emkam neibynta ki paidbah yong ka thaaiñ.

Advertisement ad1
Share this:
Previous

Jop ka Evergreen FC yaka Pasadwar ha Wahiajer

Next

Du 300 tylli ki kor wow thap pyrtuid yaki 30 lak tam haka MHIS