Jowai : Ka seiñ FKJGP Jaiñtia Hills lyngba ka khubor wada e da u President yong ka u ma Tuesday Lytep da ong u wa ka seiñ maham joor ko ya kiwa yah kari khian wa kari heh wa lada chem ya ki kari kiwa tympleh light heipor wa lai ki hei miet.
Da ong u wa ka seiñ sñiawkhia ko yeini i leh kiwa yah kari neibhah dei langer jooh jia ki kaam yatyrrah du neidaw wa tympleh headlight ki kari ha kylleiñ ki sarok khamtam ha ki bynta u sarokbah ha New Hill, Jowai iwa da jooh wanrah yei mynsoo ki bru wa lai luti dei kjat wei kamjooh leh kiwi tawan ki kari. Wei lada chem ya kiwa leh pyrchah yeini ka seiñ daw pynchitom ko ki katkam ka aiñ.
U SP ka West Jaiñtia Hills u R Muthu da pyntip u wa jooh jia ki tyrrah kari næ chah tyrrah ki bru khamtam hei miet toh wa jooh tympleh light wei ki wym em light kam ki Brake Light, Ki Turn Signal wa kiwi kiwi.
Da pyntip leh wa ha kini ki ar sngi ki pulit pyllai kari (traffic police), ka Jowai Police Station da chem ki 15 tylli ki truck wa ym em biang ya ki Brake Light wa kiwi ki light wei da daiñ kuna ya ki wa da poi hadooh T. 4000.
Discussion about this post